థియేటర్​ యజమానులకు ప్రభుత్వం అండ - చిరు హర్షం

లాక్​డౌన్​ వల్ల నష్టపోయిన థియేటర్ల యాజమానులను ఆదుకునేందుకు కొన్ని రాయితీలను ప్రకటించింది ఏపీ ప్రభుత్వం. దీనిపై మెగాస్టార్ చిరంజీవి ట్విట్టర్ వేదికగా స్పందించి ప్రభుత్వానికి కృతజ్ఞతలు చెప్పారు.

కరోనా, లాక్​డౌన్​ వల్ల థియేటర్లు మూతపడి తెలుగు చిత్రసీమ భారీగా నష్టపోయింది. ఈ నేపథ్యంలో థియేటర్ల యాజమానులను ఆదుకునేందుకు ఏపీ ప్రభుత్వం మంగళవారం ఓ జీఓ జారీ చేసింది. పలు రాయితీలు ప్రకటించింది.

ఇవీ రాయితీలు..

• 2020 ఏప్రిల్​ నుంచి జూన్​ వరకు సింగిల్​ స్క్రీన్​, మల్టీప్లెక్సుల్లో స్థిర విద్యుత్తు ఛార్జీల మాఫీ.
• 2020 జులై నుండి డిసెంబరకు చెల్లించాల్సిన స్థిర విద్యుత్తు ఛార్జీల గడువు పొడిగింపు.
• థియేటర్ల యజమానులు బ్యాంకుల నుంచి తీసుకున్న రుణాల పై వడ్డీ రాయితీ. ఏ, బీ సెంటర్లలో అత్యధికంగా రూ.10 లక్షల వరకు , సీ సెంటర్లలో రూ.5 లక్షల వరకు తీసుకున్న రుణాలకు ఇది వర్తిస్తుంది.

చిత్రసీమను కాపాడేందుకు తీసుకున్న చర్యలపై సీఎం జగన్​ను ప్రశంసించారు మెగాస్టార్​ చిరంజీవి. ఏపీ ప్రభుత్వానికి కృతజ్ఞతలు తెలిపారు.

తెలంగాణ ప్రభుత్వం కూడా ఇదే తరహా రాయితీలను ప్రకటించింది.

ఇదీ చూడండి: 'పవన్‌తో నటిస్తున్నానంటే నమ్మబుద్ధి కాలేదు'