స్టార్ హీరోయిన్ శ్రుతిహాసన్ ఇటీవల నటించిన 'క్రాక్' చిత్రం బాక్సాఫీసు వద్ద ఘనవిజయాన్ని నమోదు చేయడం సహా ఆమె పాత్రకు ప్రశంసలు దక్కాయి. దీంతో ఈ ముద్దుగుమ్మకు అవకాశాలు వెతుక్కుంటూ వస్తున్నాయి. డార్లింగ్ ప్రభాస్ హీరోగా నటించనున్న 'సలార్' చిత్రంలో హీరోయిన్ రోల్ కోసం చిత్రబృందం శ్రుతిని సంప్రదించినట్లు సమాచారం. దీనిపై అధికార ప్రకటన రావాల్సిఉంది.
'సలార్' చిత్రంలో ప్రభాస్ సరసన నటించేందుకు ఇప్పటికే బాలీవుడ్ భామలు సారా అలీఖాన్, దిశాపటానీలనూ చిత్రబృందం ఎంపిక చేసినట్లు ప్రచారం జరుగుతోంది. ఈ చిత్రానికి ప్రశాంత్ నీల్ దర్శకత్వం వహిస్తుండగా.. విజయ్ కిరాగుండూర్ నిర్మాతగా వ్యవహరిస్తున్నారు.
ఇదీ చూడండి: సింగరేణిలో ప్రభాస్ 'సలార్' షూటింగ్!
