అందంతోనే కాదు అభినయంతోనూ మెప్పిస్తామంటూ చాలా మంది యువ కథానాయికలు అప్పుడప్పుడు చెప్తుంటారు. కథ డిమాండ్‌ చేస్తే ఏ పాత్రకైనా సై అంటుంటారు. వచ్చిన అవకాశాలు అందిపుచ్చుకుంటూ అలరిస్తుంటారు. అయితే ఇది అన్ని సమయాల్లో కాదు. ప్రేమికురాలు, వైద్యురాలు, ఉపాధ్యాయురాలు, చెల్లి, అక్క, అత్త.. ఇలా వయసుకు మించిన పాత్రలైనా, ఏ వృత్తి పాత్రల్లోనైనా ఇట్టే ఇమిడిపోతారు కానీ వేశ్యగా నటించాలంటే కాస్త వెనకడుగు వేస్తుంటారు.
కెరీర్‌ తారస్థాయిలో ఉన్నప్పుడు 'వేదం' చిత్రంలో ఇదే పాత్రలో అనుష్క నటించి ఔరా అనిపించింది. ఆ తర్వాతా కొందరు నాయికలు అలా మెరిశారు. ఇప్పుడు అదే ప్రయత్నం చేయబోతుందట శ్రద్ధా దాస్. 'ఆర్య 2', 'డార్లింగ్' ,'గుంటూరు టాకీస్', 'గరుడవేగ'.. చిత్రాల్లో నటించిందీ ముద్దుగుమ్మ. ప్రస్తుతం దర్శకుడు విద్యాసాగర్‌ తెరకెక్కిస్తున్న ఓ చిత్రంలో వేశ్య పాత్రలో శ్రద్ధా నటించే అవకాశాలున్నాయంటూ సినీ వర్గాల్లో వినిపిస్తోంది. భావోద్వేగంతో ముడిపడి ఉన్న పాత్ర కావడం వల్ల ఆమె ఓకే చెప్పే ఆలోచనలో ఉందని సమాచారం. జగపతి బాబు ప్రధాన పాత్ర పోషిస్తున్న ఈ చిత్ర షూటింగ్‌ త్వరలోనే ప్రారంభం కానుంది.
ఇవీ చూడండి.. విజయ్ 'మాస్టర్‌' ఆగమనం అప్పుడే..!
