రైల్వే స్టేషన్లో పాడిన ఒక్క పాటతో సోషల్మీడియాలో స్టార్ అయిపోయింది రేణూ మోండల్‌. ఆమె గాత్రానికి అభిమానులు ఫిదా అవగా... బాలీవుడ్ సంగీత దర్శకుడు హిమేశ్ రేష్మియా ఏకంగా ఓ సినిమాలో పాట పాడే అవకాశమే కల్పించాడు. ఆ మహిళ ప్రతిభ మెచ్చుకున్న హీరో సల్మాన్ఖాన్... రూ.55లక్షలు విలువ చేసే ఇంటిని కానుకగా ఇచ్చినట్లు వార్తలు వచ్చాయి. దీనిపై తాజాగా స్పందించాడీ నటుడు.
"అవన్నీ తప్పుడు వార్తలు. నేను చేయని సహాయం గురించి అందరూ మాట్లాడుకోవడం నా వరకూ వచ్చింది. ఆమెకు నేను ఎలాంటి హెల్ప్ చేయలేదు".
-- సల్మాన్ఖాన్, బాలీవుడ్ నటుడు
సల్మాన్ నటిస్తున్న ఓ సినిమాలో రేణూతో ఓ పాట పాడించాలనుకుంటున్నట్లు వచ్చిన వార్తలపైనా స్పందిస్తూ... అవన్నీ పుకార్లేనని స్పష్టం చేశాడు.
ప్రస్తుతం 'దబాంగ్ 3'లో చుల్‌బుల్‌ పాండే పాత్రలో కనిపించనున్నాడు సల్మాన్. ఇందులో సోనాక్షి సిన్హా కథానాయిక. ప్రముఖ కొరియోగ్రాఫర్‌ ప్రభుదేవా దర్శకత్వం వహిస్తున్నాడు. ఈ సినిమాను సల్మాన్, అర్బాజ్‌ ఖాన్, నిఖిల్‌ ద్వివేది సంయుక్తంగా నిర్మిస్తున్నారు. హిందీ, కన్నడ, తమిళ, తెలుగు భాషల్లో... ఈ ఏడాది డిసెంబరు 20న ప్రేక్షకుల ముందుకు రానుందీ చిత్రం.
ఇదీ చదవండి...
