కన్నుగీటి యువ హృదయాల్ని కొల్లగొట్టి ఒకే ఒక రాత్రిలో సంచలనం సృష్టించింది మలయాళీ ముద్దుగుమ్మ ప్రియా ప్రకాశ్ వారియర్. నటిగానే కాకుండా తనలోని సింగర్ను అప్పుడప్పుడు బయటపెడుతుంటుంది. అయితే తాజాగా తెలుగులోనూ గాయనిగా తన అదృష్టాన్ని పరీక్షించుకోబోతుందీ ముద్దుగుమ్మ. సంగీత దర్శకుడు శ్రీ చరణ్‌ పాకాల రూపొందిస్తోన్న ఓ ప్రైవేటు ఆల్బమ్‌లో ఈమె పాట పాడిందని తెలిసింది. త్వరలోనే ఇది విడుదల కాబోతుందని సమాచారం. ఇప్పటికే మలయాళం, కన్నడ భాషల్లో పాటలను ఆలపించింది ప్రియా. ఈ విషయం తెలిసిన ఆమె తెలుగు అభిమానులు.. ఈ గీతం కోసం ఎంతో ఆత్రుతగా ఎదురుచూస్తున్నారు.
'ఒరు అదార్‌ లవ్'తో తెరంగేట్రం చేసిన ఈ భామ ఒక్క సినిమాతోనే దేశవ్యాప్తంగా గుర్తింపు సంపాదించుకుంది. దీంతో అన్ని చిత్ర పరిశ్రమల వాళ్లు ప్రియతో సినిమా చేసేందుకు ఆసక్తి చూపుతున్నారు. ప్రస్తుతం ఆమె తెలుగులో నితిన్‌ సరసన 'చెక్‌' చిత్రంలో నటిస్తోంది. ఈ చిత్రానికి చంద్రశేఖర్ ఏలేటి దర్శకుడు.
ఇదీ చూడండి : బోల్డ్ పాత్రతో కన్నడలోకి ప్రియా వారియర్
