భారత ప్రధాని నరేంద్ర మోదీ జీవితాధారంగా తెలుగు, తమిళ భాషల్లో ఓ చిత్రం తెరకెక్కుతోంది. టైటిల్ పాత్రలో అభయ్ వర్మ నటిస్తున్నారు. దీనికి తెలుగులో 'మనోవిరాగి'గా, తమిళంలో 'కర్మయోగి'గా పేర్లు నిర్ణయించారు. గురువారం మోదీ పుట్టినరోజు సందర్భంగా ఈ చిత్ర టైటిల్ పోస్టర్లను విడుదల చేశారు.
చిత్ర సమర్పకులు ఎ.సుభాస్కరన్‌ మాట్లాడుతూ.. "ప్రధాని మోదీ టీనేజ్‌ జీవితంలోని ముఖ్యమైన మలుపులతో తెరకెక్కుతోన్న చిత్రమిది. మోదీ స్వరాష్ట్రం గుజరాత్‌లోని వాద్‌ నగర్‌, ఉత్తరాఖండ్‌ రాష్ట్రంలోని ప్రదేశాలలో ఈ సినిమా చిత్రీకరణ జరిపాం. ప్రస్తుతం నిర్మాణాంతర కార్యక్రమాలు జరుగుతున్నాయి. త్వరలోనే ప్రేక్షకుల ముందుకు తీసుకొస్తాం" అని తెలిపారు.
తెలుగు, తమిళ భాషల్లో తెరకెక్కుతోన్న ఈ చిత్రానికి ఎస్‌.సంజయ్ త్రిపాఠీ దర్శకుడు. లైకా ప్రొడక్షన్స్‌ సమర్పణలో ప్రముఖ బాలీవుడ్‌ దర్శకుడు సంజయ్ లీలా భన్సాలీ, మహవీర్‌ జైన్‌ నిర్మిస్తున్నారు.
