గ్రీన్ ఛాలెంజ్లో పాల్గొన్న హీరో ప్రభాస్
యంగ్ రెబల్ స్టార్ ప్రభాస్ పర్యావరణం పట్ల తన బాధ్యత చాటుకున్నారు. తన నివాస ప్రాంగణంలో రెండు మొక్కలు నాటి అభిమానుల్లో స్ఫూర్తి నింపారు. తెలంగాణలో పచ్చదనాన్ని పెంపొందించేందుకు రాజ్యసభ సభ్యులు సంతోష్ కుమార్ మొదలుపెట్టిన గ్రీన్ ఇండియా ఛాలెంజ్లో భాగంగా మూడో విడత కార్యక్రమాన్ని ప్రభాస్ లాంఛనంగా ప్రారంభించారు. ఎంపీ సంతోష్ కుమార్తో కలిసి మొక్కలు నాటారు. వాటి గుర్తుగా ఇద్దరు స్వీయ చిత్రాలు తీసుకుని ఆనందించారు.
ఈ సందర్భంగా మూడో విడత గ్రీన్ ఇండియా ఛాలెంజ్ను ప్రారంభించిన ప్రభాస్కు ఎంపీ సంతోష్ కుమార్ ప్రత్యేక కృతజ్ఞతలు తెలిపారు. రెండేళ్లుగా సినీ, రాజకీయ, క్రీడా ప్రముఖులను గ్రీన్ ఇండియా ఛాలెంజ్లో భాగస్వాములను చేస్తూ లక్షలాది మొక్కలు నాటించిన సంతోష్ కుమార్.. మూడో దశలోనూ అదే జోరుతో మొక్కలు నాటించాలని సంకల్పించారు.
