సూపర్స్టార్ మహేశ్ బాబు, మాటల మాంత్రికుడు త్రివిక్రమ్ శ్రీనివాస్‌ దర్శకత్వంలో ఓ సినిమా చేయనున్నారు. యాక్షన్‌ ఎంటర్‌టైనర్‌తో పాటు ప్రేమకథా చిత్రంగా తెరకెక్కనున్న ఈ సినిమాలో నాయికగా పూజాహెగ్డేని ఎంపిక చేశారని సమాచారం. ఇప్పటికే పూజాతో చిత్రబృందం చర్చలు కూడా జరిపిందట. స్క్రిప్టు విన్న ఆమె సానూకూలంగా స్పందించినట్లు తెలుస్తోంది. త్వరలోనే మహేశ్తో కలిసి పనిచేయడానికి గ్రీన్‌ సిగ్నల్‌ ఇవ్వనుందని సినీ వర్గాలు చెప్పుకుంటున్నాయి.
'ఎస్‌ఎస్‌ఎమ్‌బీ 28' వర్కింగ్ టైటిల్‌గా రూపొందనున్న ఈ సినిమాను హారిక అండ్‌ హాసిని సంస్థతో కలిసి జీఎమ్‌బీ ఎంటర్‌టైన్‌మెంట్ సంయుక్తంగా నిర్మించనుంది. త్వరలోనే సినిమా సెట్స్ పైకి వెళ్లనుంది. చిత్రానికి సంబంధించిన అధికారిక ప్రకటనను త్వరలోనే రానుంది. గతంలో త్రివిక్రమ్-మహేశ్ బాబు కాంబినేషన్లో 'అతడు', 'ఖలేజా' వంటి చిత్రాలు వచ్చాయి. ఇప్పుడు ముచ్చటగా మూడో సినిమాగా 'ఎస్‌ఎస్‌ఎమ్‌బీ 28' తెరకెక్కనుంది.
పూజాహెగ్డే-మహేశ్బాబుతో కలిసి 'మహర్షి' చిత్రంలో నటించి అభిమానుల్ని అలరించింది. ప్రస్తుతం మహేశ్- పరశురామ్‌ దర్శకత్వంలో రూపొందుతున్న 'సర్కారు వారి పాట'తో బిజీగా ఉన్నారు. పూజాహెగ్డే - ప్రభాస్‌తో కలిసి 'రాధేశ్యామ్', చిరంజీవి కథానాయకుడిగా నటిస్తోన్న 'ఆచార్య'లోనూ నటిస్తున్నారు.
ఇదీ చూడండి: 'బాహుబలి', 'రాధేశ్యామ్' రికార్డు బ్రేక్ చేసిన 'పుష్ప'
