'ఆర్‌.ఆర్‌.ఆర్‌' సెట్స్‌ నుంచి ఎన్టీఆర్ బయటకు రావడానికి ఈ ఏడాది చివరి దాకా సమయం పట్టే అవకాశముంది. అయితే ఈలోపే ఆయనతో తమ తర్వాతి చిత్రాన్ని ఫిక్స్‌ చేసుకోవడానికి అగ్ర దర్శక, నిర్మాతలందరూ పోటీ పడుతున్నారు. ఇప్పటికే మైత్రీ మూవీస్‌ తమ తర్వాతి చిత్రం తారక్‌తో చేయబోతున్నట్లు ప్రకటించేసింది. దీనికి 'కేజీఎఫ్' ఫేం ప్రశాంత్ నీల్ దర్శకుడిగా వ్యవహరించబోతున్నట్లు ఇప్పటికే ఖాయమైంది.
అయితే ఇప్పుడీ రేసులోకి త్రివిక్రమ్, కొరటాల శివ కూడా దూసుకొచ్చినట్లు సమాచారం అందుతోంది. ఎన్టీఆర్ ఇప్పటికే వీరిద్దరితో చెరో సినిమా చేసి విజయాలు అందుకున్నాడు. ఈ నేపథ్యంలో వీరి కలయికలో మరో సినిమా వస్తుందంటే ప్రేక్షకుల్లో అంచనాలు మరింత పెరుగుతాయి. ప్రస్తుతం సినీ వర్గాల నుంచి అందుతున్న సమాచారం ప్రకారం.. కొరటాల, త్రివిక్రమ్ ఇద్దరూ తారక్‌కు కథలు వినిపించేశారట. వీటిలో కొరటాల చెప్పిన కథ కన్నా.. మాటల మాంత్రికుడి స్టోరీ లైన్‌ తారక్‌కు బాగా నచ్చేసిందట. అందుకే మరోసారి తన స్వామీజీతో కలిసి సెట్స్‌లో అడుగుపెట్టేందుకు రెడీ అవబోతున్నాడట.
ఇప్పటికే మైత్రి.. తారక్‌తో తర్వాతి సినిమా తమదే అంటూ ప్రకటన చేసిన నేపథ్యంలో ఆయన తొలుత ప్రశాంత్‌కు అవకాశమిస్తాడా? లేక త్రివిక్రమ్ వైపు మొగ్గు చూపుతాడా? అన్నది ఆసక్తికరంగా మారింది. ప్రస్తుతానికైతే ఈ ఇద్దరు దర్శకులు ఒకరు 'కేజీఎఫ్ 2'తో మరొకరు 'ఏఏ 19'తో బిజీగా గడిపేస్తున్నారు. అయితే వీరిలో కాస్త ముందుగా సెట్స్‌పై నుంచి దిగేది మాటల మాంత్రికుడే. ప్రశాంత్ మాత్రం వచ్చే వేసవికి కానీ ఫ్రీ అయ్యేటట్లు కనిపించడం లేదు. ఇక ఇటు ఎన్టీఆర్‌ను చూసినా ఆయన 'ఆర్‌.ఆర్‌.ఆర్‌'కు సంబంధించిన అన్ని బాధ్యతలను పూర్తిచేసుకుని రావాలన్నా జులై వరకు వేచి చూడక తప్పదు. మరి ఈలోపు తారక్‌ ఏం నిర్ణయం తీసుకుంటాడో వేచి చూడాలి.
ఇవీ చూడండి.. 'ఈ విజయాన్నిచ్చిన తెలుగు ప్రేక్షకులకు కృతజ్ఞతలు'
