అడ్డులకింక చెక్ చెక్... హద్దులకింక చెక్ చెక్... అంటూ 'చెక్' చిత్రం కోసం పాడుకున్నారు నితిన్ - ప్రియా ప్రకాశ్ వారియర్. భవ్య క్రియేషన్స్‌ పతాకంపై వి.ఆనంద్‌ప్రసాద్‌ నిర్మిస్తున్న చిత్రమిది. చంద్రశేఖర్‌ యేలేటి దర్శకత్వం వహిస్తున్నారు. రకుల్‌ప్రీత్‌ సింగ్‌, ప్రియా ప్రకాశ్ వారియర్ కథానాయికలు. 'నిన్ను చూడకుండా ఉండలేకపోతున్నాను' అంటూ మొదలయ్యే ఈ చిత్రంలోని గీతాన్ని ఇటీవల గోవాలో నితిన్ - ప్రియపై షూటింగ్ చేశారు. దాంతో సినిమా మొత్తం పూర్తయిందని సినీ వర్గాలు తెలిపాయి. ఈ నెల 26న చిత్రాన్ని విడుదల చేస్తున్నారు.
"యాక్షన్‌కి థ్రిల్‌ను మేళవించి రూపొందించిన ఓ మంచి చిత్రమిది. కథానుగుణంగా సినిమాలో ఒక్క పాటకే చోటుంది. ఆ పాట అందరినీ అలరించేలా, మూడు రోజులపాటు గోవాలో అందమైన లొకేషన్లలో చిత్రీకరించాం. కల్యాణి మాలిక్‌ స్వరపరిచిన ఈ గీతానికి శ్రీమణి సాహిత్యం అందించగా, శేఖర్‌ నృత్య రీతులు సమకూర్చారు. నిర్మాణానంతర కార్యక్రమాలు దాదాపుగా పూర్తయ్యాయి. ట్రైలర్ విడుదల తర్వాత దీనిపై అంచనాలు పెరిగాయి. వాటిని తప్పకుండా అందుకుంటుందీ చిత్రం" అని నిర్మాత చెప్పారు.
