రెబల్స్టార్ ప్రభాస్-దీపికా పదుకొణె...
ప్రభాస్ కథానాయకుడిగా నాగ్ అశ్విన్ దర్శకత్వంలో పాన్ ఇండియా సినిమా తెరకెక్కుతోంది. ఇందులో ఈ బాహుబలికి జోడిగా దీపికా పదుకొణె నటిస్తోంది. ప్రస్తుతం సినిమాకు సంబంధించిన పూర్వ నిర్మాణ పనులు పూర్తయ్యాయి. సినిమా సెట్స్పైకి వెళ్లాల్సి ఉంది. దీన్ని వైజయంతీ మూవీస్‌ పతాకంపై సి.అశ్వనీదత్‌ నిర్మిస్తున్నారు. ప్రస్తుతం రాధాకృష్ణ దర్శకత్వంలో ప్రభాస్ ‘రాధే శ్యామ్‌’లో నటిస్తున్నారు.
కత్రినా-సిద్ధాంత్ చతుర్వేది...
బాలీవుడ్ నటి కత్రినా కైఫ్, సిద్ధాంత్ చతుర్వేది, ఇషాన్ ఖత్తర్ ప్రధానపాత్రలో నటిస్తున్న చిత్రం 'ఫోన్ భూత్'. తొలిసారి వీరందరూ కలిసి నటించనున్నారు. హారర్ కామెడీ కథాంశంతో సినిమా రూపొందుతోంది. 2021లో 'ఫోన్ భూత్' సినిమాను ప్రేక్షకుల ముందుకు తీసుకురానున్నారు. ఈ వినోదాత్మక చిత్రానికి రవిశంకరన్, జస్విందర్ సింగ్ బాత్ రచన అందించగా.. గుర్మీత్ సింగ్ దర్శకత్వం వహించనున్నారు. ఈ ఏడాది చివర్లో షూటింగ్ ప్రారంభించడానికి చిత్రబృందం సన్నాహాలు చేస్తోంది.
అక్షయ్కుమార్-మిస్వరల్డ్ మానుషీ
బాలీవుడ్ స్టార్ హీరో అక్షయ్ కుమార్ సరసన మాజీ మిస్ వరల్డ్ మానుషీ చిల్లర్ హీరోయిన్గా అవకాశం దక్కించుకుంది. 'పృథ్వీరాజ్' సినిమాలో సన్యోగితా పాత్రతో తెరంగేట్రం చేస్తోంది. తొలిసారి ఈ జంట వెండితెరపై కనిపించనుంది. 'పృథ్వీరాజ్ చౌహాన్' పాత్రలో అక్షయ్ కనిపించనున్నారు. చంద్రప్రకాశ్ ద్వివేది దర్శకుడు. యశ్రాజ్ ఫిల్మ్స్ నిర్మాతగా వ్యవహరిస్తోంది. ఈ ఏడాది చివర్లో చిత్రం ప్రేక్షకుల ముందుకు రానుంది.
విజయ్దేవరకొండ-అనన్యా పాండే
పూరీ జగన్నాథ్- విజయ్ దేవరకొండ కాంబినేషన్లో తెరకెక్కుతున్న పాన్ ఇండియా చిత్రంలో.. బాలీవుడ్ భామ అనన్యా పాండే కథానాయికగా నటిస్తోంది. పూరీ కనెక్ట్స్ బ్యానర్‌పై పూరీ జగన్నాథ్, ఛార్మీ సంయుక్తంగా ఈ చిత్రాన్ని నిర్మిస్తున్నారు. వీరితో పాటే బాలీవుడ్ ప్రముఖ నిర్మాత కరణ్ జోహర్ ఈ ప్రాజెక్టులో భాగమయ్యారు.ఈ సినిమా కోసం విజయ్.. థాయ్‌లాండ్లో మార్షల్ ఆర్ట్స్ నేర్చుకున్నారు. ఇందులో రమ్యకృష్ణ కీలక పాత్రలో కనిపించనుందని సమాచారం. 'జై లవకుశ' ఫేమ్ రోనిత్ రాయ్ విలన్గా చేస్తున్నారు. ప్రస్తుతం ఈ చిత్రం కోసం 'ఫైటర్' అనే టైటిల్ను పరిశీలిస్తోంది చిత్రబృందం.
షాహిద్ కపూర్-మృణాళ్ ఠాకూర్
టాలీవుడ్‌ యువ కథానాయకుడు నాని నటించిన 'జెర్సీ' హిందీలో రీమేక్‌ చేస్తున్నారు. ఇందులో నాని పాత్రలో షాహిద్ కపూర్ నటిస్తున్నారు. దీనికి సూపర్ 30, బద్లాహౌస్ చిత్రాల ఫేం 'మృణాళ్ ఠాకూర్' హీరోయిన్గా ఎంపికైంది. తెలుగులో దర్శకత్వం వహించిన గౌతమ్‌ తిన్ననూరినే హిందీలోనూ తెరకెక్కిస్తున్నారు. ప్రముఖ నిర్మాతలు అల్లు అరవింద్, దిల్‌రాజు, అమన్‌ గిల్‌ రూపొందిస్తున్న ఈ చిత్రం వచ్చే ఏడాది విడుదల కానుంది.
అక్షయ్-ధనుష్-సారా అలీఖాన్
బాలీవుడ్ నటుడు అక్షయ్ కుమార్, తమిళ నటుడు ధనుష్‌లతో ఓ క్రేజీ ప్రాజెక్టు రూపొందుతోంది. వీరిద్దరితో ప్రముఖ బాలీవుడ్ దర్శకుడు ఆనంద్‌ ఎల్‌. రాయ్ తెరకెక్కిస్తున్న చిత్రం 'అత్రాంగి రే'. సారా అలీఖాన్ కథానాయిక. ఇప్పటికే మొదలైన ఈ ప్రాజెక్టు... తొలి షెడ్యూల్ పూర్తి చేసుకుంది. అయితే కరోనా వల్ల చిత్రీకరణ తాత్కాలికంగా వాయిదా పడింది. ప్రస్తుతం మళ్లీ షూటింగ్లు పునఃప్రారంభం అవుతున్న వేళ మళ్లీ పట్టాలెక్కనుందీ సినిమా. కొత్త షెడ్యూల్ మధురై, దిల్లీ, ముంబయిలో ఉంటుందని సమాచారం. జాతీయ అవార్డు గ్రహీత హిమాన్షు శర్మ కథ అందిస్తుండగా, ఎ.ఆర్‌. రెహమాన్‌ సంగీత స్వరాలు సమకూరుస్తున్నారు. భూషణ్‌ కుమార్ నిర్మిస్తున్న ఈ చిత్రం... 2021 ఫిబ్రవరిలో ప్రేక్షకుల ముందుకు రానుంది.
రణ్వీర్-షాలిని పాండే
ప్రముఖ బాలీవుడ్ హీరో రణ్వీర్ సింగ్ హీరోగా తెరకెక్కుతున్న చిత్రం 'జయేశ్‌భాయ్ జోర్దార్'. యష్రాజ్ ఫిల్మ్స్ పతాకంపై మనీష్ శర్మ ఈ సినిమాను నిర్మిస్తున్నారు. దివ్యాంగ్ ఠాకర్ దర్శకుడు. ఈ సినిమాలో రణ్వీర్ సింగ్ సరసన.. అర్జున్ రెడ్డి హీరోయిన్ షాలిని పాండే నటించనుంది. ప్రస్తుతం రణ్వీర్ సింగ్ ఈ సినిమా కాకుండా ఇండియన్ కామిక్స్ ఐకానిక్ సూపర్ హీరో 'నాగరాజ్' పాత్రలో నటించనున్నట్లు తెలుస్తోంది.
కార్తిక్ ఆర్యన్-కియారా
కార్తిక్ ఆర్యన్, కియారా అడ్వాణీ హీరోహీరోయిన్లుగా నటిస్తున్న బాలీవుడ్ చిత్రం 'భూల్ భులయీ 2'. హారర్ కథాంశంతో రూపొందుతోంది. గతేడాది చిత్రీకరణ ప్రారంభమైంది. అక్షయ్ కుమార్ నటించిన 'భూల్ భులయా'కు కొనసాగింపుగా తెరకెక్కుతోందీ సినిమా. అనీష్ బజ్మీ దర్శకత్వం వహిస్తున్నారు. మురాద్ ఖేతాని, క్రిష్ణన్ కుమార్ సహ నిర్మాతలుగా వ్యవహరిస్తున్నారు. కరోనా నేపథ్యంలో సినిమా విడుదల వాయిదా పడింది.
రామ్చరణ్-ఆలియా భట్
'ఆర్‌ఆర్‌ఆర్‌' చిత్రంలో రామ్చరణ్ సరసన నటిస్తోంది బాలీవుడ్ ముద్దుగుమ్మ ఆలియా భట్. వీరిద్దరూ కలిసి తొలిసారి తెరపై కనువిందు చేయనున్నారు. కరోనా పరిస్థితుల నేపథ్యంలో చిత్రం తాత్కాలికంగా వాయిదా పడింది. ఇప్పటికే 80 శాతానికిపైగా చిత్రీకరణ పూర్తికాగా.. మిగిలిన షూట్‌ పూర్తి కావడానికి మరో రెండు మూడు నెలలు సమయం పట్టనుంది. అల్లూరి సీతారామరాజు, కొమురం భీమ్‌ల జీవితాల స్ఫూర్తితో అల్లుకున్న ఫిక్షనల్‌ కథాంశంతో.. రాజమౌళి ఈ చిత్రాన్ని రూపొందిస్తున్నారు. ఇందులో అల్లూరిగా చరణ్.. భీమ్‌ పాత్రను తారక్‌ చేస్తున్నారు.
