నేచురల్ స్టార్ నాని కథానాయకుడిగా తెరకెక్కిన కుటుంబ కథా చిత్రం 'టక్ జగదీష్'. శివ నిర్వాణ దర్శకుడు. ఈ సినిమా విడుదల విషయంలో ఎప్పటి నుంచో సందిగ్ధత కొనసాగుతోంది. తాజాగా దీనిపై నాని స్పష్టత ఇచ్చారు. ఓటీటీలో విడుదల చేయనున్నట్లు చెప్పకనే చెప్పారు. నిర్మాత ప్రయోజనాన్ని దృష్టిలో పెట్టుకుని, వాళ్లు ఏ నిర్ణయం తీసుకుంటే దానికి కట్టుబడి ఉంటానని అన్నారు. ఈ మేరకు ఒక ప్రకటన విడుదల చేశారు.
ఇప్పుడిప్పుడే థియేటర్లలో వరుస సినిమాలు విడుదలవుతున్నా, ఏపీలో పూర్తి స్థాయిలో థియేటర్లు తెరుచుకోని నేపథ్యంలో 'టక్‌జగదీష్‌'ను ఓటీటీ వేదికగా విడుదల చేయాలని చిత్ర నిర్మాణ సంస్థ షైన్‌స్క్రీన్‌ భావించింది. అమెజాన్‌ ప్రైమ్‌ వేదికగా ఈ సినిమా ప్రేక్షకుల ముందుకు తీసుకువచ్చే అవకాశం ఉంది. విడుదల తేదీ ఇతర వివరాలను త్వరలోనే వెల్లడించనున్నారు.
సత్యదేవ్ కొత్త చిత్రం
'తిమ్మరుసు'తో ఇటీవల ప్రేక్షకుల్ని పలకరించిన యువ నటుడు సత్యదేవ్ కొత్త చిత్రం మొదలైంది. వీవీ గోపాలకృష్ణ దర్శకత్వంలో ఆయన నటిస్తున్న సినిమా బుధవారం పూజా కార్యక్రమాలతో లాంఛనంగా ప్రారంభమైంది. ప్రముఖ నిర్మాత దిల్‌ రాజు క్లాప్‌నిచ్చారు. దర్శకుడు హరీశ్‌ శంకర్‌ ముహూర్తపు సన్నివేశానికి కెమెరా స్విచ్ఛాన్‌ చేసి, గౌరవ దర్శకత్వం వహించారు. ఈ చిత్రాన్ని ప్రముఖ దర్శకుడు కొరటాల శివ సమర్పిస్తున్నారు. అరుణాచల క్రియేషన్స్‌ పతాకంపై కొమ్మలపాటి కృష్ణ నిర్మిస్తున్నారు. కాలభైరవ స్వరాలు సమకూర్చనున్నారు. ఇతర నటీనటులు, టైటిల్‌ వివరాలు త్వరలోనే తెలియనున్నాయి. సత్యదేవ్‌కు ఇది 25వ చిత్రం కావడం గమనార్హం.
పూర్తి చేసిన కీర్తి
నటి కీర్తి సురేశ్ నటిస్తున్న కొత్త చిత్రం 'సాని కాయిదం' సినిమా షూటింగ్ పూర్తైంది. ఇందులో కీర్తి 'డీగ్లామర్' రోల్లో కనిపించనుంది. ఈ సినిమాలో ప్రముఖ తమిళ దర్శకుడు సెల్వరాఘవన్ ఓ పాత్ర పోషిస్తున్నారు. '7/జీ బృందావన్ కాలనీ', 'యుగానికి ఒక్కడు', 'ఆడవారి మాటలకు అర్థాలే వేరులే' వంటి సినిమాలతో ఆయన తెలుగు ప్రేక్షకులను ఆకట్టుకున్నారు. అరుణ్ మాతేశ్వరన్ ఈ చిత్రానికి దర్శకుడు.
సెన్సార్కు అలీ కొత్త చిత్రం
అలీ, నరేశ్‌ ప్రధాన పాత్రల్లో తెరకెక్కుతోన్న చిత్రం 'అందరూ బాగుండాలి.. అందులో నేనుండాలి'. 'ఆల్‌ ఈజ్‌ వెల్‌' అనేది ఉపశీర్షిక. ఈ సినిమా సెన్సార్ కార్యక్రమాల్ని పూర్తి చేసుకుంది. యూ సర్టిఫికేట్ను అందుకుంది. శ్రీపురం కిరణ్‌ దర్శకుడు. ఆలీబాబా, కొణతాల మోహన్‌, శ్రీచరణ్‌ సంయుక్తంగా నిర్మిస్తున్నారు.
ఇదీ చూడండి: హాట్ పోజులు.. అదిరిపోయే సొగసులు!
