సూపర్స్టార్ మహేశ్ కోసం మెగాస్టార్ చిరంజీవి రాబోతున్నాడు. ఎందుకంటే? దర్శకుడు అనిల్ రావిపూడి మహేశ్తో తెరకెక్కిస్తోన్న చిత్రం 'సరిలేరు నీకెవ్వరు'. ఈ సినిమా ముందస్తు విడుదల కార్యక్రమానికి చిరు ముఖ్య అతిథిగా హాజరవుతున్నాడు. ఈ విషయాన్ని సామాజిక మాధ్యమాల వేదికగా ప్రకటించింది చిత్రబృందం.
దర్శకుడు అనిల్ రావిపూడితో పాటు నిర్మాతలు దిల్రాజు, అనిల్ సుంకర స్వయంగా చిరంజీవిని ప్రీరిలీజ్ వేడుకకు రావల్సిందిగా ఆహ్వానించారు. చిరు కూడా రావడానికి వెంటనే అంగీకరించాడట. ఇందుకు కృతజ్ఞతలు తెలుపుతూ మహేశ్ ఓ సందేశాన్ని ట్విట్టర్ వేదికగా షేర్ చేశాడు.
"మా ఆహ్వానాన్ని మన్నించి ప్రీరిలీజ్ వేడుకకు హాజరవబోతున్న చిరంజీవి గారికి కృతజ్ఞతలు. ఈ వేడుకలో మీరూ పాల్గొనడం సంతోషంగా ఉంది. మీ రాకతో మా ఆనందం రెట్టింపవుతుంది. ఈ వేడుక కోసం ఎదురుచూస్తున్నా."
-మహేశ్ బాబు, సినీ నటుడు
హైదరాబాద్‌లోని ఎల్బీ స్టేడియంలో జనవరి 5న ఈ కార్యక్రమం నిర్వహించనున్నారు. మహేశ్ కోసం చిరు వస్తుండడం వల్ల సినీ అభిమానుల్లో ఆసక్తి పెరుగుతోంది. ఇప్పటికే విడుదలైన పాటలు, పోస్టర్లు సినిమాపై అంచనాలు పెంచుతున్నాయి. సంక్రాంతి కానుకగా జనవరి 11న ప్రేక్షకుల ముందుకు రానుందీ చిత్రం.
ఇవీ చూడండి.. రణ్‌బీర్‌ - శ్రద్ధల చిత్రం వచ్చేది అప్పుడే
