కింగ్ నాగార్జున హీరోగా రాహుల్ రవీంద్రన్ దర్శకత్వంలో తెరకెక్కుతోన్న చిత్రం 'మన్మథుడు-2'. 2002na బాక్సాఫీస్‌ వద్ద ఘన విజయం సాధించిన 'మన్మథుడు' చిత్రానికి ఈ సినిమా సీక్వెల్. తొలి భాగంలానే మరోసారి అందమైన భామలతో కలిసి సందడి చేయబోతున్నాడు నాగ్. రకుల్‌ప్రీత్‌ సింగ్‌ ఈ సినిమా ప్రధాన కథానాయిక. సమంత, కీర్తి సురేశ్ కీలక పాత్రలు పోషిస్తున్నారు.
ప్రస్తుతం హైదరాబాద్‌లో ఈ సినిమా చిత్రీకరణ జరుగుతోంది. నాగార్జున, ఇతర చిత్రబృందంపై కీలక సన్నివేశాల్ని తెరకెక్కిస్తున్నారు. మరో నటి కీర్తి సురేశ్ చిత్రీకరణలో పాల్గొన్నట్లు మంగళవారం ప్రకటించింది చిత్రబృందం. కీర్తి కొత్త స్టిల్స్‌ను సోషల్మీడియాలో అభిమానులతో పంచుకుంది. ఈ సినిమాలో ఆమె నాగార్జునకు ప్రేయసిగా కనిపించనున్నట్లు సమాచారం.
శరవేగంగా సాగుతోన్న ఈ సినిమా చిత్రీకరణ ఇప్పటికే సింహభాగం పూర్తయినట్టు తెలుస్తోంది. ‘మన్మథుడు’ తరహా వినోదంతో ఈ చిత్రం రూపొందుతోందని సినిమా వర్గాలు చెబుతున్నాయి. మంచు లక్ష్మీ, వెన్నెల కిషోర్, రావు రమేష్, ఝాన్సీ, దేవదర్శిని తదితరులు నటిస్తున్నారు.
మనం ఎంటర్‌ప్రైజస్, ఆనంది ఆర్ట్‌ క్రియేషన్స్, వయాకామ్‌ 18 మోషన్‌ పిక్చర్స్‌ కలిసి రూపొందిస్తోన్న ఈ చిత్రానికి నాగార్జున, పి.కిరణ్‌ నిర్మాతలు. చైతన్య భరద్వాజ్‌ సంగీతం సమకూర్చారు.
