నాగచైత్య, సాయిపల్లవి జంటగా నటించిన చిత్రం 'లవ్స్టోరీ'. శేఖర్ కమ్ముల దర్శకత్వం వహించిన ఈ సినిమా ఇప్పటికే ఓసారి వాయిదా పడింది. ఇప్పుడు ఈ చిత్రం మరోసారి వాయిదా పడనున్నట్లు సినీ వర్గాల్లో టాక్ వినిపిస్తోంది. సెప్టెంబరు 10న వినాయక చవితి కానుకగా ఈ సినిమా ప్రేక్షకుల ముందుకు రానున్నట్టు ఇటీవల చిత్ర బృందం ప్రకటించింది. అయితే ఈ నిర్ణయంపై ఇప్పుడు చిత్ర బృందం వెనక్కి తగ్గినట్లు గుసగుసలు వినిస్తున్నాయి. 'లవ్స్టోరీ'ని సెప్టెంబరు చివరి వారంలో లేదా అక్టోబరులో తొలివారంలోవిడుదల చేసే యోచనలో ఉన్నట్లు సమాచారం. ఈ వార్తే నిజమైతే అభిమానులకు కాస్త నిరాశే.
పండక్కి సీటీమార్..
గోపీచంద్ కథనాయకుడిగా తెరకెక్కిన చిత్రం 'సీటీమార్'. కబడ్డీ నేపథ్యంలో సాగే ఈ చిత్రంలో కథానాయికగా తమన్నా నటిస్తోంది. ఇప్పటికే పలుమార్లు వాయిదా పడుతూ వస్తున్న ఈ సినిమా రిలీజ్ డేట్ను మరోసారి వెనక్కి జరిపినట్లు టాలీవుడ్లో చర్చ జరుగుతోంది. సెప్టెంబరు 3న విడుదల కావాల్సిన ఈ సినిమాను పండుగ పూట సెప్టెంబరు 10న రిలీజ్ చేయాలని చిత్ర బృందం భావిస్తున్నట్లు తెలుస్తోంది. అదే రోజు నాని నటించిన 'టక్ జగదీశ్' ఓటీటీలో విడుదల కావడం గమనార్హం.
మాస్ట్రో కూడా..
నితిన్ కథానాయకుడిగా నటించిన 'మాస్ట్రో' విడుదల కూడా వాయిదా పడినట్టు సమాచారం. సెప్టెంబరు 9న హాట్స్టార్లో స్ట్రీమ్ అవ్వాల్సిన ఈ సినిమాను.. మరో తేదీన రిలీజ్ చేయాలని మూవీ టీమ్ భావిస్తున్నట్టు తెలుస్తోంది. బాలీవుడ్ సూపర్హిట్ చిత్రం 'అంధాధున్'కు రిమేక్గా తెరకెక్కిన మాస్ట్రోలో నభా నటేశ్, తమన్నా కథానాయికలుగా నటించారు.
సెప్టెంబరు 10న 'తలైవీ'
బాలీవుడ్ స్టార్ కథానాయిక కంగనా రనౌత్ నటించిన చిత్రం 'తలైవీ'. ఈ సినిమాను సెప్టెంబరు 10న విడుదల చేస్తున్నట్లు చిత్రబృందం ఇదివరకే ప్రకటించింది. తెలుగు, తమిళం, హిందీ భాషల్లో విడుదల కానున్న ఈ చిత్రానికి ఏఎల్ విజయ్ దర్శకత్వం వహించారు.
ఇదీ చదవండి : దేశభక్తిని రగిల్చిన 75 అద్భుత దృశ్య కావ్యాలివే!
