అనారోగ్యం కారణంగా మెరుగైన వైద్యం కోసం సినిమాలకు తాత్కాలిక విరామం ఇస్తున్నట్లు ఇటీవలే ప్రకటించారు బాలీవుడ్ నటుడు సంజయ్ దత్. దీనిపై స్పందించిన పలువురు సినీ ప్రముఖులు ఆయన త్వరగా కోలుకోవాలని ఆశించారు. ఈ క్రమంలో 'కేజీఎఫ్: ఛాప్టర్2'లో ఆయన నటించాల్సిన సన్నివేశాలు దాదాపుగా పూర్తయ్యాయని నిర్మాణ సంస్థ ఓ ఇంటర్వ్యూలో ప్రకటించింది.
"సంజయ్ దత్ త్వరగా కోలుకొని తిరిగి రావాలని కోరుకుంటున్నాం. కేజీఎఫ్ చిత్రంలో ఆయనకు సంబంధించిన సన్నివేశాలు దాదాపుగా పూర్తి చేశాం. ఆయన కోలుకున్న తర్వాత మిగిలిన ఒకటి లేదా రెండు సన్నివేశాలను చిత్రీకరించడం సహా పాత్రకు సంబంధించిన డబ్బింగ్ను పూర్తి చేస్తాం" అని 'కేజీఎఫ్' చిత్ర నిర్మాణ సంస్థ వెల్లడించింది.
సంజయ్ పుట్టినరోజు సందర్భంగా 'కేజీఎఫ్: ఛాప్టర్2' చిత్రంలోని ప్రతినాయకుడు అధీరా లుక్ను విడుదల చేసింది చిత్రబృందం. ప్రస్తుతం 'షంషేర్', 'భుజ్: ది ప్రైడ్ ఆఫ్ ఇండియా', 'కేజీఎఫ్: చాప్టర్2', 'పృథ్వీరాజ్' చిత్రాల్లో నటిస్తున్నారు సంజయ్ దత్. ఆయన నటించిన 'సడక్ 2' చిత్రం ఈ నెలాఖరున ఓటీటీలో ప్రేక్షకుల ముందుకు రానుంది.
