బోయపాటి శిష్యుడు అర్జున్ జంధ్యాల దర్శకుడిగా ప‌రిచ‌య‌మ‌వుతూ...కార్తికేయ మూడో సినిమాగా తెరకెక్కుతోంది 'గుణ 369'. స్ప్రింట్‌ ఫిలిమ్స్‌, జ్ఞాపిక ఎంటర్‌టైన్‌మెంట్స్ సంయుక్తంగా నిర్మిస్తున్న చిత్రమిది. అనిల్‌ కడియాల, తిరుమల్రెడ్డి నిర్మాతలు. ఈ సినిమా టైటిల్ పోస్టర్ను నేడు విడుదల చేశారు. ఇప్పటికే సగభాగం చిత్రీకరణ పూర్తయినట్లు దర్శకుడు అర్జున్ వెల్లడించారు.
'ఇంత‌కు ముందు ఒంగోలులో భారీ షెడ్యూల్ చేశాం. మ‌ళ్లీ ఏప్రిల్ 29 నుంచి మే 15 వ‌ర‌కు మ‌రో షెడ్యూల్ కోసం ఏర్పాట్లు చేస్తున్నాం.ఇటీవ‌లే క్రొయేషియాలో 2 పాట‌లు తీశాం. ఒక పాట మినహా మొత్తం సినిమా రెడీ అయిపోతుంది'.
--దర్శకుడు, అర్జున్ జంధ్యాల
'యథార్థ కథాంశాలతో బోయపాటి శిష్యుడైన అర్జున్ జంధ్యాల ఈ క‌థ‌ను అద్భుతంగా తీర్చిదిద్దారు. విన‌గానే చాలా ఇంప్రెస్ అయి వెంటనే ఓకే చెప్పేశాం. ల‌వ్, యాక్ష‌న్ జోన‌ర్‌లో సినిమా ఉంటుంది. హీరో కార్తికేయ `ఆర్ ఎక్స్ 100`, `హిప్పీ` క‌న్నా విభిన్నంగా కనిపిస్తాడు'.
- నిర్మాతలు, అనిల్‌ కడియాల, తిరుమ‌లరెడ్డి
'కొన్ని క‌థ‌లు విన‌గానే న‌చ్చుతాయి.... మ‌ళ్లీ మ‌ళ్లీ గుర్తుకొస్తుంటాయి. నాకు అర్జున్ జంధ్యాల కథ చెప్పిన వెంటనే నచ్చేసింది. ఇప్ప‌టిదాకా తీసిన షూట్ చాలా బాగా వచ్చింది. కచ్చితంగా మరోసారి ఈ సినిమా మీ హృదయాలను హత్తుకుంటుంది'.
--హీరో, కార్తికేయ
ఈ చిత్రానికి చైతన్య భరద్వాజ్‌ సంగీతం సమకూర్చారు. ఆర్ఎక్స్ 100’ చిత్రానికి పనిచేసిన కెమేరామెన్ రామ్ దీనికి పనిచేస్తున్నారు.
'హిప్పీ' అనే చిత్రంతో కోలీవుడ్‌ ఎంట్రీ కూడా ఇస్తున్నాడు కార్తికేయ. ఈ సినిమాకు టీఎన్ కృష్ణ దర్శకత్వం వహిస్తున్నాడు. నాని నటిస్తున్న 'గ్యాంగ్ లీడర్' చిత్రంలోనూ విలన్గా కనిపించనున్నాడు.
ఇవీ చూడండి.. తొలిరోజే 'అవెంజర్స్' రికార్డు వసూళ్లు
