జెస్సీ.. నీ ప్రేమ నాకు కావాలి: కార్తీక్

కార్తీక్, జెస్సీ అదేనండి నాగ చైతన్య, సమంత జంటగా నటించిన చిత్రం 'ఏమాయే చేసావె'. తమిళంలో ఈ పాత్రలను శింబు, త్రిష పోషించారు. గౌతమ్ మేనన్ దర్శకత్వం వహించారు. అయితే లాకౌడౌన్​ కారణంగా ఈ సినిమా నేపథ్యంలో ఓ షార్ట్ ఫిల్మ్​ను తెరకెక్కించారు గౌతమ్. అది ప్రేక్షకులను ఆకట్టుకుంటోంది.

కార్తీక్‌, జెస్సీ.. ఈ రెండు పేర్లు వినగానే సినీ ప్రేమికులకు గుర్తుకు వచ్చే సినిమా.. 'ఏమాయ చేసావె'. గౌతమ్ మేనన్ దర్శకత్వంలో తెరకెక్కిన ఈ ప్రేమకథా చిత్రానికి ఎంతో మంది అభిమానులున్నారు. తెలుగులో నాగచైతన్య, సమంత నటించిన ప్రాతలను తమిళంలో శింబు, త్రిష పోషించారు. అయితే లాక్‌డౌన్‌ కారణంగా ఇంటికే పరిమితమైన సినీ తారలు విభిన్నమైన అంశాలతో షార్ట్‌ ఫిలింస్​ను రూపొందించి ప్రేక్షకులను ఆకట్టుకుంటున్నారు. ఈ క్రమంలో తాజాగా గౌతమ్‌ మేనన్‌.. శింబు, త్రిషలతో ఓ షార్ట్‌ఫిల్మ్‌ను రూపొందించారు. ఎవరి ఇళ్లలో వారే ఉండి దీనిని చిత్రీకరించారు. 'కార్తీక్ డయల్ సేతా యెన్' పేరుతో రూపొందించిన ఈ షార్ట్‌ ఫిల్మ్‌లో కార్తీక్‌.. జెస్సీకి ఫోన్‌ చేసి మాట్లాడతాడు.

షార్ట్‌ఫిల్మ్‌లో జెస్సీ(త్రిష) భార్య పాత్రలో కనిపిస్తుంది. కార్తీక్‌ (శింబు) లాక్‌డౌన్‌ కారణంగా సినీ పరిశ్రమలో ఎలాంటి పనులు లేకపోయిన కారణంగా నిరాశకు గురైన ఓ యువ దర్శకుడిగా దర్శనమిస్తారు. కథ రాయాలని భావించిన కార్తీక్‌కు జెస్సీ గుర్తుకువచ్చి.. వెంటనే ఆమెకు ఫోన్‌ చేసి.. "నువ్వు కేరళలో ఉన్నావని నాకు తెలుసు" అని అంటాడు. "అవును.. నీకు ఎలా తెలుసు" అని జెస్సీ ప్రశ్నిస్తుంది. "మాస్క్‌లు పంచుతూ ఇటీవల మీ సోదరి పెట్టిన ఫేస్‌బుక్‌ పోస్ట్‌లో నిన్ను చూశాను" అని చెబుతాడు.

ఆ తర్వాత జెస్సీని.. భర్త, పిల్లలు, న్యూయార్క్‌ నుంచి ఇండియాకి రావడానికి గల కారణాలను కార్తీక్‌ అడిగి తెలుసుకుంటాడు. అనంతరం లాక్‌డౌన్‌ వల్ల సినీ పరిశ్రమలో తాను ఎలాంటి ఇబ్బందులు ఎదుర్కొంటున్నాడో చెబుతూ భావోద్వేగానికి గురైన కార్తీక్‌.. "నాకు నువ్వు కావాలి జెస్సీ, నీ ప్రేమ నాకు కావాలి" అని అంటాడు. కార్తీక్‌ బాధను అర్థం చేసుకున్న జెస్సీ.. "ఐ లవ్‌ యూ కార్తీక్‌.. నువ్వు నాకో బేబి. కానీ ఇది నువ్వు అనుకున్న ప్రేమ కాదు. నీలో గొప్ప రచయిత ఉన్నాడు. నీ టాలెంట్‌ని బయటపెట్టు. మంచి కథ రాయి. త్వరలోనే థియేటర్లు ఓపెన్‌ చేస్తారు. పరిస్థితులు చక్కబడతాయి" అని ఓదారుస్తుంది. జెస్సీతో మాట్లాడిన తర్వాత సంతోషంగా ఫీలైన కార్తీక్‌.. తాను అనుకున్న కథను పూర్తి చేస్తాడు.

తాజాగా విడుదలైన ఈ షార్ట్‌ఫిల్మ్‌లో కార్తీక్‌, జెస్సీ పాత్రల్లో శింబు, త్రిష మరోసారి మేజిక్‌ చేశారు. మధురమైన చిన్న ప్రేమకథతో గౌతమ్‌ మేనన్‌ తనదైన శైలిలో ఆకట్టుకున్నారు. ఏఆర్‌ రెహమాన్‌ అందించిన సంగీతం అలరిస్తుంది. తాజాగా విడుదలైన ఈ షార్ట్‌ఫిల్మ్‌ను చూసిన నెటిజన్లు.. "సూపర్‌గా ఉంది" అంటూ కామెంట్లు చేస్తోన్నారు.

• " class="align-text-top noRightClick twitterSection" data="">