దర్శకధీరుడు రాజమౌళి తీస్తున్న 'ఆర్ఆర్ఆర్' సినిమాకు లీకుల బాధ తప్పడం లేదు. ఇంతకు ముందు ఓ సారి షూటింగ్లో ఎన్టీఆర్ లుక్స్ బయటకు రాగా, ఇప్పుడు ఏకంగా తారక్పై తీస్తున్న ఓ ఫైట్ సీన్కు సంబంధించిన వీడియోనే లీకైంది.
అడవి పులి, కొమరం భీమ్ పాత్రల మధ్య జరిగే భీకర పోరాటాన్ని, ఇటీవలే ఎంతో ప్రయాసతో చిత్రీకరించారు. ఇప్పుడు ఆ వీడియో కాస్త లీకవడం వల్ల చిత్ర యూనిట్ అప్రమత్తమైంది. ఆన్లైన్ నుంచి ఆ విజువల్ను తొలగించింది. అయితే నెటిజన్లు మాత్రం.. అందులో ఎన్టీఆర్ లుక్ బాగుందని కామెంట్లు పెడుతున్నారు.
ఇందులో చరణ్ అల్లూరి సీతారామరాజుగా నటిస్తున్నాడు. ఆలియా భట్, ఒలీవియా మోరిస్ హీరోయిన్లు. అజయ్ దేవగణ్, సముద్రఖని, అలీసన్ డూడీ, రే స్టీవెన్సన్ తదితరులు కీలక పాత్రలు పోషిస్తున్నారు. కీరవాణి సంగీతమందిస్తున్నాడు. సినిమాను ఈ ఏడాది జూలైలో కాకుండా అక్టోబరులో విడుదల చేయాలని చిత్రబృందం భావిస్తున్నట్లు వార్తలు వస్తున్నాయి. మరి వాటిలో నిజమెంతో తెలియాలంటే మరికొద్ది రోజులు ఆగాల్సిందే.
