ఒకరి తల ఒకరికి గుద్దుకుంటే కొమ్ములొస్తాయని మీకెవరైనా చెబితే మీరు నమ్ముతారా? కచ్చితంగా నమ్మరు. కానీ ఈ ముద్దుగుమ్మ నమ్మేస్తుంది. అంతే కాదండోయ్ పొరపాటుగా ఎవరి తలైనా ఆమెకి తలకు గుద్దుకుంటే.. తిరిగి వాళ్ల తలను తన తలతో గుద్దే వరకు వదిలిపెట్దదు. ఇంతకీ ఏంటి చిన్నపిల్లలా నీకీ నమ్మకం అంటే.. "బాగుంటాయి కదా.. అందుకే నమ్మేస్తున్నా.." అని కొంటెగా బదులిస్తుంది ఈ అల్లరి పిల్ల. ఇంకేంటి సంగతులు అంటూ ఆమెను కదిపితే.. "ఇంకేం కావాలి? వీలైతే నాలుగు మాటలు, కుదిరితే కప్పు కాఫీ" అంటూ సరదాగా కబుర్లు చెబుతుంది. ఇప్పటికే అర్థమైందనుకుంటా.. ఆమె హ..హ్హ..హ్హా హాసిని. అదేనండి జెనీలియా. ఈ అల్లరి హీరోయిన్ పుట్టినరోజు ఈరోజు. ఈ సందర్భంగా ప్రత్యేక కథనం.
ఈ ముద్దుగుమ్మ పూర్తి పేరేంటో తెలుసా? జెనీలియా డిసౌజా. తల్లి జినెట్, నాన్న నీల్ల పేరు కలిపి జెనీలియా అని పేరుపెట్టారు. ఈ అల్లరి పిల్ల ఆగస్టు 5, 1987 ముంబయిలో జన్మించింది.
'బొమ్మరిల్లు' చిత్రంతో తెలుగువారింటి ఆడపడుచులా అందరి మదిలో అందమైన పొదరిల్లు నిర్మించుకుంది నటి జెనీలియా. 2003లో బాలీవుడ్ చిత్రం 'తుఝే మేరీ కసమ్'తో వెండితెరకు పరిచయమైన ఈ ముంబయి భామ.. శంకర్ దర్శకత్వంలో వచ్చిన 'బాయ్స్' సినిమాతో తెలుగు వారికి పరిచయమైంది. ఇందులో హరిణి అనే యువతిగా జెన్నీ కనబర్చిన నటనకు సినీ ప్రియుల నుంచే కాక విమర్శకుల నుంచి మంచి ప్రశంసలు లభించాయి. ఆ వెంటనే సుమంత్కు జోడీగా 'సత్యం'లో నటించి మరో చక్కటి విజయాన్ని తన ఖాతాలో వేసుకున్నా సరైన గుర్తింపు కోసం 'బొమ్మరిల్లు' చిత్రం వరకు వేచి చూడాల్సి వచ్చింది.
- " class="align-text-top noRightClick twitterSection" data="">
ఈ మధ్యలో బాలీవుడ్లో 'మస్తీ', తమిళ్లో 'సచిన్' వంటి చిత్రాలతో అక్కడ కూడా నిరూపించుకునే ప్రయత్నం చేస్తూనే తెలుగులో బిజీగా మారింది. ఇక ఎన్టీఆర్తో 'సాంబ', 'నా అల్లుడు', వెంకటేష్తో 'సుభాష్ చంద్రబోస్', అల్లు అర్జున్తో చేసిన 'హ్యాపీ' చిత్రాలు ఆశించిన స్థాయిలో ఆకట్టుకోలేకపోయినా నటిగా జెన్నీకి మంచి పేరు తెచ్చిపెట్టాయి. ముఖ్యంగా 'హ్యాపీ'లోని క్లైమాక్స్ సన్నివేశాల్లో ఆమె కనబర్చిన నటన ప్రతి ఒక్కరినీ కంటతడి పెట్టించింది.
- " class="align-text-top noRightClick twitterSection" data="">
ఇక జెనీలియా కెరీర్లో 'సై', 'ఢీ', 'బొమ్మరిల్లు', 'రెడీ' వంటి చిత్రాలు మైలురాళ్లుగా నిలిచాయి. ముఖ్యంగా 'బొమ్మరిల్లు'లో హాసినిగా జెన్నీ చేసిన అల్లరి యువతరంతో పాటు కుటుంబ ప్రేక్షకులను విశేషంగా ఆకట్టుకుంది. ఈ సినిమాకు గాను ఉత్తమ నటిగా ‘ఫిల్మ్ఫేర్’, ‘సంతోషం’ అవార్డులతో పాటు ‘నంది స్పెషల్ జ్యూరీ’ పురస్కారాన్ని అందుకోవడం విశేషం.
2009 తర్వాత చేసిన 'లైఫ్ పార్టనర్' (హిందీ), 'ఆరెంజ్', 'ఫోర్స్' (హిందీ), 'తేరే నాయి లవ్ హో గయా' (హిందీ), 'నా ఇష్టం' చిత్రాలు నిరుత్సాహ పరచగా 'జయహో' (హిందీ), 'ఫోర్స్2' సినిమాలు విజయాలందుకున్నాయి.
- " class="align-text-top noRightClick twitterSection" data="">
2012లో బాలీవుడ్ నటుడు రితేష్ దేశ్ముఖ్ను ప్రేమ వివాహం చేసుకున్న తర్వాత నాలుగేళ్ల పాటు సినిమాల్లో నటించిన జెనీలియా తర్వాత తల్లి కావడం వల్ల సినిమాలకు దూరమైంది. ప్రస్తుతం ఆమెకు ఇద్దరు పిల్లలు ఉన్నారు. ఈ ముద్దుగుమ్మ తెలుగులో నటించిన చివరి చిత్రం రానాతో చేసిన 'నా ఇష్టం' (2012), కాగా బాలీవుడ్లో 'ఫోర్స్2' (2016).
దాదాపు 13 సంవత్సరాల పాటు సాగిన జెనీలియా సినీ కెరీర్లో తెలుగు, తమిళ, హిందీ, మలయాళ భాషల్లో మొత్తం 30కి పైగా సినిమాల్లో నటించింది. ఇన్నేళ్ల పాటు కొనసాగిన జెన్నీ సినిమా ప్రయాణం మొదలైంది మాత్రం ‘పార్కర్ పెన్’ యాడ్తో. బాలీవుడ్ మెగాస్టార్ అమితాబ్ బచ్చన్తో చేసిన ఈ ప్రకటన వల్లే జెన్నీ చిత్రసీమలోకి ప్రవేశించే అవకాశాన్ని దక్కించుకుంది.