ఈ ఏడాది డిసెంబరులో రజనీకాంత్‌ అభిమానులు రెండు పండగలు జరుపుకోబోతున్నారు. వాళ్లకు మాత్రమే ఉన్న ఆ పండగలేంటి అని ఆలోచిస్తున్నారా? ఒకటి అందరికీ తెలిసిందే. అదే రజనీ పుట్టిన రోజు. డిసెంబరు 12 ఆయన అభిమానులకు పండగే అని ప్రత్యేకంగా చెప్పనవసరం లేదు. దీనికి ముందే ఆయన అభిమానులు మరొక ఉత్సవం జరుపుకోబోతున్నారని కోలీవుడ్‌లో వినిపిస్తోంది. ఆ రెండో పండగ ఏంటంటే.. ‘దర్బార్’ చిత్ర ముందస్తు విడుదల కార్యక్రమం.
రజనీ నటించిన చిత్రాల విషయంలో ఏ కార్యక్రమమైనా ఆయన అభిమానులకు పండగే కదా! రజనీ పుట్టిన రోజు కంటే 5 రోజుల ముందు డిసెంబరు 7న ఈ కార్యక్రమం నిర్వహించనున్నట్లు సమాచారం. ఈ మేరకు సన్నాహాలు జరుగుతున్నాయని సినీ వర్గాల టాక్‌. అధిక సంఖ్యలో సినీ ప్రముఖులు హాజరవుతారని తెలుస్తోంది. త్వరలోనే అధికారిక ప్రకటన వచ్చే అవకాశాలున్నాయి. ఏఆర్‌ మురుగదాస్‌ దర్శకత్వంలో తెరకెక్కుతున్న ఈ చిత్రంలో కథానాయికగా నయనతార నటిస్తోంది.
ఇదీ చూడండి:ముంబయిలో అదిరిన హాలీవుడ్‌ గాయనుల సందడి
