ప్రముఖ నటి పూర్ణను బ్లాక్ మెయిల్ చేస్తున్నట్లు నమోదైన కేసులో.. ఎనిమిది మందిని అదుపులోకి తీసుకున్నట్లు తెలిపారు కేరళ పోలీసులు. మరో నలుగురు పరారీలో ఉన్నట్లు వెల్లడించారు. ఈ విషయాన్ని కొచ్చి నగర పోలీస్ కమిషనర్ విజయ్ సఖ్రే స్పష్టం చేశారు. నిందితులు ఆమెను సినీఫక్కీలో కిడ్నాప్ చేసేందుకు భారీ ప్రణాళిక రచించినట్లు వివరించారు సఖ్రే.
"మొదట పూర్ణ వివాహ ప్రతిపాదన ద్వారా ఆమె కుటుంబ సభ్యులతో పరిచయం ఏర్పరచుకుని, అనంతరం కిడ్నాప్ చేయాలని ముఠా ప్లాన్ వేసింది. ఓ హోటల్ గదిలో బంధించి పెద్ద ఎత్తున ఆమె దగ్గర నుంచి డబ్బు వసూలు చేయాలనుకున్నారు. అయితే ఈ ప్రణాళిక విఫలమైంది. నటీనటుల వివరాలను సేకరించి.. సినిమా ఆఫర్ల పేరుతో వారిని వలలో వేస్తారు. అనంతరం వారిని బెదిరించి డబ్బులను డిమాండ్ చేయడం వీరికి మామూలే. ఈ ఏడాది మార్చిలోనూ పాలక్కాడ్లో ఎనిమిది మంది మోడల్స్ను బంధించి, వారి దగ్గర నుంచి ఈ ముఠా డబ్బులు వసూలు చేశారు. ఈ నేపథ్యంలో ప్రస్తుతం పూర్ణ, ఇతర మహిళల ఫిర్యాదుల ఆధారంగా వీరిపై ఏడు కేసులు నమోదు చేశాం."
-విజయ్ సఖ్రెే, నగర పోలీస్ కమిషనర్.
ఈ కేసులో ఆరోపణలు ఎదుర్కొంటున్న ప్రముఖ హాస్య నటుడు ధర్మజన్ బోల్గట్టిని కూడా విచారించినట్లు వెల్లడించారు సఖ్రెే. ఇందులో ఇతర సినీ వ్యక్తుల హస్తం లేదని స్పష్టం చేశారు.
ఇది చూడండి : కూతురు కావాలంటే హత్యలు చేయాల్సిందే!
