నచ్చిన హీరోలు, హీరోయిన్లు అంటే చెయ్యి కోసుకునే అభిమానులు ఎంతోమంది. ముఖ్యంగా దక్షిణాదిన ఈ అభిమానం మరీ ఎక్కువ. కొంత మంది సినీ నటులకు దేవాలయాలు కట్టడం, పూజలు చేయడం చూశాం. ఇటీవల ఓ వ్యక్తి తనకు ఇష్టమైన నటి కాజల్ అగర్వాల్ను కలిసేందుకు ప్రయత్నించి మోసపోయాడు. రూ. 60 లక్షలు పోగొట్టుకున్నాడు.
తమిళనాడులోని రామంతపురానికి చెందిన ఓ అభిమాని.. కాజల్ను కలవాలనుకున్నాడు. ఇందుకోసం నెట్టింట ఓ వెబ్సైట్లో వివరాలు చూశాడు. ఆ సైట్ నిర్వాహకులతో మాట్లాడిన ఆ అభిమాని... హీరోయిన్ వ్యక్తిగత సమాచారం కోసం తొలుత 50 వేలు చెల్లించాడు. తర్వాత మూడు దఫాలుగా 60 లక్షల వరకు ఆన్లైన్ ద్వారా నగదు బదిలీ చేశాడు.
ఎన్ని రోజులైనా నటి దగ్గరికి తీసుకెళ్లడం లేదని అడగ్గా... ఈ విషయం బయట చెప్తే ఆ అభిమాని నగ్న చిత్రాలు నెట్టింట పెడతామని బెదిరించారు. భారీగా డబ్బు పోగొట్టుకున్న వీరాభిమాని... ఒత్తిడి తట్టుకోలేక ఇంట్లో నుంచి పారిపోయాడు. అతడి కుటుంబసభ్యులు పోలీసులను ఆశ్రయించగా... కోల్కతాలో ఆచూకి లభించింది. బాధితుడి వివరాల మేరకు ఓ నిర్మాతపైన కేసు నమోదు చేశారు.
శర్వానంద్కు జోడీగా 'రణరంగం'లో నటించింది కాజల్. ఈ సినిమా ఆగస్టు 15న విడుదలకు సిద్ధమౌతోంది. ప్రస్తుతం 'ప్యారిస్ ప్యారిస్' చిత్రంలో నటిస్తోందీ నటి. ఈ సినిమా కన్నడ, తెలుగు, మలయాళ భాషల్లో విడుదల కానుంది.
ఇవీ చూడండి...'సైరా'ను పోలిన సమీరా కూతురి పేరు...!
