పవర్ స్టార్ పవన్ కల్యాణ్ హీరోగా రెండు సినిమాలు రాబోతున్నాయి. 'పింక్' రీమేక్ 'వకీల్ సాబ్'తో పాటు... క్రిష్ జాగర్లమూడి దర్శకత్వంలో తెరకెక్కనున్న మరో చిత్రంలోనూ నటిస్తున్నారు పవన్. ప్రస్తుతం వకీల్ సాబ్ దాదాపు షూటింగ్ పూర్తి చేసుకుంది. క్రిష్ చిత్రం కొంతవరకు చిత్రీకరణ జరుపుకొంది. అయితే కరోనా కారణంగా ఈ రెండు సినిమాల షూటింగ్ వాయిదా పడింది. కానీ ఈ సమయంలోనూ పవన్ ఫ్యాన్స్కు ఓ డబుల్ బొనాంజా రాబోతుందట.
ఈ రెండు చిత్రాల్లో నుంచి ఏ చిన్న అప్డేట్ అయినా వస్తుందేమో అని అభిమానులు ఆశగా ఎదురుచూస్తున్నారు. అయితే సెప్టెంబర్ 2న పవన్ పుట్టినరోజు సందర్భంగా ఫ్యాన్స్ను సర్ప్రైజ్ చేసేందుకు చిత్రబృందాలు సిద్ధమయ్యాయట. ఆరోజు వకీల్సాబ్ టీజర్తో పాటు క్రిష్ దర్శకత్వంలో రాబోతున్న సినిమా ఫస్ట్లుక్ విడుదలయ్యే అవకాశం ఉందని సమాచారం.
