మెగాస్టార్ చిరంజీవి-బాబీ కాంబినేషన్‌లో రానున్న సినిమా మెగా అభిమానులకు ఫుల్ ట్రీట్‌ కానుందని నిర్మాతలు నవీన్‌, రవి శంకర్‌ తెలిపారు. చిరంజీవి, బాబీ కాంబోలో ప్రముఖ నిర్మాణ సంస్థ మైత్రీ మూవీ మేకర్స్ బ్యానర్‌పై త్వరలో ఓ సినిమా పట్టాలెక్కనుంది. ఈ క్రమంలోనే తాజాగా ఆ సినిమా కథ గురించి నిర్మాతలు ఓ ఆసక్తికర విషయాన్ని బయటపెట్టారు. పక్కా కమర్షియల్‌ ఎంటర్‌టైనర్‌గా ఈ సినిమా ఉండనుందని తెలిపారు.
"ఇది పక్కా కమర్షియల్‌ ఎంటర్‌టైనర్‌. మెగాస్టార్ నటించిన 'ఘరానా మొగుడు', 'రౌడీ అల్లుడు', 'గ్యాంగ్‌లీడర్‌', 'ముఠామేస్త్రి'.. ఆ స్టైల్‌లో ఈ సినిమా కథ ఉంటుంది. సినీ ప్రియులకు ఇది ఫుల్ ట్రీట్‌ కానుంది. మేము కూడా ఈ సినిమా కోసం ఎంతో ఆసక్తిగా ఎదురుచూస్తున్నాం" అని వివరించారు.
వైష్ణవ్‌ తేజ్‌, కృతిశెట్టి జంటగా నటించిన 'ఉప్పెన' మైత్రీ మూవీ మేకర్స్ బ్యానర్‌పై నిర్మితమైంది. బుచ్చిబాబు దర్శకత్వం వహించిన ఈ సినిమా ప్రేమికుల దినోత్సవం సందర్భంగా ఫిబ్రవరి 12న ప్రేక్షకుల ముందుకు రానుంది.
ప్రస్తుతం మెగాస్టార్ 'ఆచార్య' ప్రాజెక్ట్‌లో బిజీగా ఉన్నారు. కొరటాల శివ దర్శకత్వం వహిస్తున్నారు. 'ఆచార్య' తర్వాత చిరు 'లూసిఫర్‌' రీమేక్‌, 'వేదాళం' రీమేక్‌ పనుల్లో బిజీ కానున్నారు.
