ఎక్కువగా ఆర్జిస్తున్న సెలబ్రిటీల్లో బాలీవుడ్ నటీనటులు ముందుంటారు. వారి పారితోషికాలూ ఘనంగానే ఉంటాయి. సక్సెస్లో ఉన్న హీరోలకు అయితే చెప్పాల్సిన అవసరం లేదు. వరుస ఫ్లాపులతో డీలా పడ్డ కథానాయకులు ఒక్క హిట్ పడగానే రెమ్యునరేషన్ పెంచుతుంటారు. అలా పారితోషికాలు హైక్ చేసిన వారు ఎవరో ఈ కథనంలో తెలుసుకుందాం.
రణ్బీర్ కపూర్-సంజు
వరుస ఫ్లాపులతో సతమతమవుతున్న రణ్బీర్ కపూర్కు 'సంజు'తో భారీ విజయం దక్కింది. రాజ్కుమార్ హిరాణీ దర్శకత్వం వహించిన ఈ చిత్రం.. కలెక్షన్లతో పాటు విమర్శకుల ప్రశంసలూ అందుకుంది. ఇందులోని నటనకు రణ్బీర్ ఉత్తమ నటుడిగా ఫిల్మ్ఫేర్ అవార్డు అందుకున్నాడు. అయితే ఈ సినిమా విజయం తర్వాత ఒక్కసారిగా రెమ్యునరేషన్ పెంచాడట రణ్బీర్. రూ.3 నుంచి 6 కోట్లు ఎక్కువగా డిమాండ్ చేస్తున్నట్లు తెలుస్తోంది.
వరుణ్ ధావన్- జుడ్వా 2
సల్మాన్ ఖాన్ నటించిన 'జుడ్వా'కు కొనసాగింపుగా తెరకెక్కిన సినిమా 'జుడ్వా 2'. వరుణ్ ధావన్ హీరోగా నటించాడు. గతేడాది వచ్చిన ఈ చిత్రం.. బాక్సాఫీస్ వద్ద ఘనవిజయం సాధించింది. ఫలితంగా వరుణ్ రెమ్యునరేషన్ పెంచేశాడు. ఆ తర్వాత నుంచి ఒక్కో సినిమాకు దాదాపు రూ.25 కోట్లు తీసుకుంటున్నట్లు సమాచారం.
దీపికా పదుకొణె- పద్మావత్
'పద్మావత్' సినిమాలో నటించినందుకు రూ.13 కోట్ల పారితోషికం అందుకుంది హీరోయిన్ దీపికా పదుకొణె. ఇందులో ప్రధాన పాత్రలు పోషించిన రణ్వీర్ సింగ్, షాహిద్ కపూర్లు.. చెరో రూ.10 కోట్లు మాత్రమే తీసుకున్నారు. అయితే ఈ హిట్తో దీపిక మరోసారి రెమ్యునరేషన్ పెంచేసిందట. బయోపిక్ '83' కోసం రూ.14 కోట్లు తీసుకుంటున్నట్లు తెలుస్తోంది.
ప్రియాంక చోప్రా- ద స్కై ఈజ్ పింక్
కొంతకాలం బ్రేక్ తీసుకున్న ప్రియాంక చోప్రా.. 'ద స్కై ఈజ్ పింక్'తో మళ్లీ బాలీవుడ్లో మెరిసింది. అయితే ఈ సినిమాతో వచ్చిన లాభాల్లో ప్రియాంక వాటా తీసుకుందని సమాచారం. అది తన రెగ్యులర్ పారితోషికం కంటే ఎక్కువని తెలుస్తోంది. హాలీవుడ్లో 'క్వాంటికో' సిరీస్తో పాటు, నిక్ జోనస్ను పెళ్లి చేసుకోవడం వల్లే బాలీవుడ్కు కాస్త విరామం వచ్చింది.
రణ్వీర్ సింగ్- పద్మావత్
పైన చెప్పినట్లుగా రణ్వీర్ సింగ్ 'పద్మావత్' కోసం రూ.10 కోట్ల రెమ్యునరేషన్ తీసుకున్నాడు. ఆ సినిమా ఇచ్చిన విజయం తర్వాత తన పారితోషికం పెంచాడట. అయితే కపిల్దేవ్ బయోపిక్ '83' కోసం రూ.13 కోట్లు అందుకున్నట్లు సమాచారం.
కరీనా కపూర్- వీర్ ది వెడ్డింగ్
ముద్దుగుమ్మ కరీనా కపూర్ వరుస విజయాలతో జోరుమీదుంది. 'జబ్ వుయ్ మెట్' నుంచి 'ఉడ్తా పంజాబ్' వరకు పలు వైవిధ్య పాత్రలతో ప్రేక్షకుల్ని మెప్పించింది. అయితే 'వీర్ ది వెడ్డింగ్' విజయం తర్వాత ఈ భామ రెమ్యునరేషన్ను పెంచిందట. కరణ్ జోహర్ తీస్తున్న భారీ ప్రాజెక్ట్ 'తఖ్త్' కోసం ఏకంగా 50 శాతం పారితోషికం పెంచినట్లు సమాచారం.
విక్కీ కౌశల్-యురి
'యురి- ద సర్జికల్ స్ట్రైక్' సినిమాతో దేశవ్యాప్త గుర్తింపు తెచ్చుకున్నాడు హీరో విక్కీ కౌశల్. బాక్సాఫీస్ దగ్గర దుమ్మురేపిన ఈ చిత్ర విజయంతో విక్కీకి పలు ప్రకటనల్లోనూ నటించే అవకాశాలు వచ్చాయి. అయితే తాను చేయబోయే కొత్త ప్రాజెక్టులకు రూ. 3-4 కోట్లు ఎక్కువగా తీసుకుంటున్నట్లు సమాచారం.
ఆయుష్మాన్ ఖురానా- డ్రీమ్ గర్ల్
సామాజిక సమస్యలు, రోజూ జరిగే సంఘటనల్నే కథలుగా ఎంచుకుంటూ సినిమాలు చేస్తున్నాడు ఆయుష్మాన్ ఖురానా. వరుస విజయాలతో బాలీవుడ్లో జోరు చూపిస్తున్నాడు. 'డ్రీమ్ గర్ల్' సినిమా తర్వాత పారితోషికాన్ని రూ.8 కోట్లు పెంచి మొత్తం రూ.10 కోట్లు డిమాండ్ చేస్తున్నాడట.
కార్తిక్ ఆర్యన్-సోనూ కీ టీటూ కీ స్వీటీ
బీ టౌన్లో పేరు తెచ్చుకుంటున్న వర్తమాన హీరోల్లో కార్తిక్ ఆర్యన్ ఒకడు. 'ప్యార్ కా పంచ్నామా' సినిమాతో మరింత గుర్తింపు తెచ్చుకున్నాడు. అయితే 'సోనూ కీ టీటూ కీ స్వీటీ' విజయం తర్వాత కార్తిక్.. తన పారితోషికాన్ని పెంచినట్లు సమాచారం. ప్రస్తుతం రూ.7 కోట్లు తీసుకుంటున్నాడట.
కంగనా రనౌత్- క్వీన్
'క్వీన్' రూపంలో కంగనా రనౌత్ అద్భుత విజయాన్ని ఖాతాలో వేసుకుంది. ఇందులో నటనకుగానూ ఉత్తమ నటిగా జాతీయ పురస్కారాన్ని అందుకుంది. ఫలితంగా తన రెమ్యునరేషన్ను పెంచిసింది. ప్రస్తుతం తీస్తున్న 'తలైవి' కోసం ఏకంగా రూ.24 కోట్లు అందుకున్నట్లు తెలుస్తోంది. ఒకవేళ ఇదే నిజమైతే భారత్లో ఎక్కువ పారితోషికం తీసుకుంటున్న నటిగా రికార్డు సృష్టిస్తుంది.
