ప్రపంచ దేశాలను కలవరపెడుతోన్న కరోనా వైరస్‌(కొవిడ్‌-19) చలనచిత్ర పరిశ్రమనూ కుదిపేస్తోంది. కరోనా దెబ్బకి ఇప్పటికే కొన్ని సినిమాల షూటింగ్లు, మరికొన్ని చిత్రాల ప్రచార కార్యక్రమాలు నిలిచిపోయాయి. తాజాగా అతిపెద్ద ఫిల్మ్ ఫెస్టివల్ 'కేన్స్' కూడా రద్దయ్యే అవకాశాలున్నాయి. ఏటా ఫ్రాన్స్లో నిర్వహించే ఈ వేడుకను కరోనా కారణంగా రద్దు చేయాలనుకుంటున్నట్లు ఆ ఫిల్మ్ ఫెస్టివల్ ప్రెసిడెంట్ పెర్రీ లెస్క్యూర్ ప్రకటించినట్లు సమాచారం.
"కరోనా తీవ్రత మార్చి చివరి నాటికి కొంతవరకు తగ్గుముఖం పట్టొచ్చు. ఏప్రిల్‌ నెల నుంచి కొంత ఉపశమనం లభిస్తుందని భావిస్తున్నాం. ఒకవేళ పరిస్థితులు ఇలాగే కొనసాగితే.. ఈ ఏడాది కేన్స్‌ను రద్దు చేస్తాం"
- పెర్రీ, కేన్స్ ఫిల్మ్ ఫెస్టివల్ ప్రెసిడెంట్.
'కేన్స్' వేడుకల్లో ఎర్రతివాచీపై అందాల భామలు అలా నడిచి వెళ్తుంటే.. వారి హొయలు తిలకించేందుకు భారీగా అభిమానులు తరలివస్తారు. ఏటా జరిగే కేన్స్ ఫిల్మ్ ఫెస్టివల్ కోసం అటు తారలతోపాటు ఇటు ప్రేక్షకులు సైతం ఎంతో ఆసక్తిగా ఎదురుచూస్తుంటారు. షెడ్యూల్ ప్రకారం ఈ ఏడాది మే 12 నుండి 23 వరకు ఈ వేడుక జరగనుంది.
ఇదీ చూడండి : ప్రభాస్ సినిమాలో సింగిల్ షాట్ కోసం రూ.2కోట్లు!
