అల్లు అర్జున్ - సుకుమార్ చిత్రమంటేనే అభిమానుల్లో అంచనాలు భారీ స్థాయిలో ఉంటాయి. వీరిద్దరి కాంబినేషన్లో వచ్చిన ఆర్య, ఆర్య-2 మంచి విజయాలు సాధించాయి. తాజాగా రాబోతున్న మూడో సినిమాకు భారీ ప్లాన్లు వేస్తున్నాడట సుకుమార్. కేరళలోని దట్టమైన అడవుల్లో ఉన్న జలపాతం దగ్గర బన్ని పరిచయ సన్నివేశాలను చిత్రీకరించాలని అనుకుంటున్నాడట.
బాహుబలిలో ప్రభాస్‌ పరిచయ సన్నివేశం కూడా కంటికి కనిపించనంత ఎత్తైన జలపాతం దగ్గరే జరిగింది. మరి అల్లు అర్జున్ సీన్ అంతకు మించి ఉండేలా సుకుమార్ జాగ్రత్త పడుతున్నాడని సమాచారం. ఈ సన్నివేశానికి సంబంధించి కొంత చిత్రీకరణ కూడా పూర్తి చేశాడని తెలుస్తోంది. అయితే ఇందులో బన్నీ పాల్గొనలేదట.
ఎర్రచందనం స్మగ్లింగ్‌ నేపథ్యంలో సాగే చిత్రమిది. ఇందులో అల్లు అర్జున్ పెద్ద గడ్డంతో కనిపించనున్నాడట. ఇందులో స్టైలిష్ స్టార్ చిత్తూరు యాసలో మాట్లాడబోతున్నాడు. పీటర్‌ హెయిన్స్‌ పోరాట సన్నివేశాలు సమకూర్చనున్నాడు.
ప్రస్తుతం 'అల...వైకుంఠపురములో' విడుదలకు సిద్ధమవుతున్న తరుణంలో ఈ సినిమా తర్వాత సుకుమార్ చిత్ర షూటింగ్లో బన్నీ పాల్గొంటాడని సమాచారం.
ఇదీ చదవండి: దిల్‌ రాజు వారసుడి చిత్ర టైటిల్‌ అదేనా?
