బాలీవుడ్‌ ప్రముఖ కథానాయకుడు అనిల్‌ కపూర్ వారసురాలిగా ఇండస్ట్రీలోకి అడుగుపెట్టిన సోనమ్ కపూర్.. తర్వాతి కాలంలో తండ్రికి తగ్గ తనయగా గుర్తింపు తెచ్చుకుంది. వరుస హిట్లతో దూసుకుపోతోంది. హిందీ చిత్రపరిశ్రమలో ఎక్కువ రెమ్యునరేషన్ తీసుకుంటున్న హీరోయిన్లలో ఈమె ఒకరు. నేడు సోనమ్ కపూర్ 35వ పుట్టిన రోజు. ఈ సందర్భంగా ఆమె సినీ ప్రయాణం, ఇతర విశేషాలు మీకోసం.
నటించింది కొన్ని సినిమాలైనా ఎక్కువ హిట్లు అందుకుంది సోనమ్ కపూర్. 'బ్లాక్‌' సినిమాతో సంజయ్‌లీలా భన్సాలీ దగ్గర సహాయ దర్శకురాలిగా బాలీవుడ్‌లోకి రంగప్రవేశం చేసింది. ఆ తర్వాత హీరోయిన్గా రణ్‌బీర్‌ కపూర్ నటించిన 'సావరియా'తో హీరోయిన్గా అరంగేట్రం చేసింది. 'రన్జానా'లో సిగ్గుపడుతూ మురిపించింది. బాలీవుడ్‌లో ఆమెకు అవకాశాలొచ్చేలా చేసిందీ చిత్రం. ఆ తర్వాత 'భాగ్‌ మిల్కా భాగ్‌'తో భారీ విజయాన్ని అందుకుంది. 'బేవకూఫియాన్'లో అల్లరిపిల్లగా అందరినీ మంత్రముగ్థుల్ని చేసింది. ఈ మూడు చిత్రాలతో హ్యాట్రిక్‌ హిట్లు అందుకుంది. 'డోలీ కీ డోలీ' చిత్రంలో మంచి ప్రతిభ కనబరిచింది.
పురస్కారాల పంట
సోనమ్ కెరీర్‌లో బ్లాక్‌ బాస్టర్‌గా నిలిచిన చిత్రం 'ప్రేమ్‌రతన్‌ ధన్‌పాయో'. దీంతో ఆమె రెమ్యునరేషన్ అమాంతం పెరిగిపోయింది. ఉగ్రవాదులు హైజాక్‌ చేసిన విమానం నుంచి ప్రయాణికులను రక్షించిన ప్రముఖ మోడల్‌ నీరజా భానోత్‌ పాత్రను 'నీర్జా'లో పోషించి. ఓ సామాజిక కోణాన్ని వెలుగులోకి తీసుకొచ్చింది. ఈ చిత్రానికిగాను జాతీయ పురస్కారంతోపాటు ఫిల్మ్‌ఫేర్‌ అవార్డులు ఈమెను వరించాయి.
వ్యాపార వేత్తతో వివాహం
'పాడ్‌మ్యాన్‌'లో అక్షయ్‌ కుమార్‌కు అక్షయపాత్రలా సాయమందిస్తూ మంచి ప్రతిభ కనబరిచింది సోనమ్. నటిగా సోనమ్ ఎన్నో అవార్డులను కైవసం చేసుకుంది. 2018 'వీరీ ద వెడ్డింగ్‌'లో నటించింది. 'సంజు'లో రణ్‌బీర్‌ సింగ్‌ ప్రేమికురాలిగా నటించింది. 2018లో సోనమ్ కపూర్, ప్రముఖ వ్యాపారవేత్త ఆనంద్‌ అహూజాను వివామాడింది. గతేడాది దుల్కర్ సల్మాన్తో కలిసి 'జోయా ఫ్యాక్టర్' సినిమాలోనూ హీరోయిన్గా కనిపించి, మెప్పించింది.
