"ఈ పొలిటికల్‌ పవర్‌ నువ్వు తీసుకున్న డిగ్రీ అనుకున్నావా.. నువ్వు చచ్చే వరకూ నీతో ఉంటుందనుకోవడానికి.. ఎలక్షన్‌.. ఎలక్షన్‌కి పవర్‌ కట్‌ అయిపోద్ది రా.." అంటూ ప్రతినాయకుడిని గడగడలాడిస్తున్నాడు నందమూరి బాలకృష్ణ. కేఎస్ రవికుమార్ దర్శకత్వంలో బాలయ్య హీరోగా నటించిన చిత్రం 'రూలర్'. వేదిక, సోనాల్‌ చౌహాన్‌ కథానాయికలు. ఈ చిత్ర ప్రీరిలీజ్ వేడుక విశాఖలో జరిగింది. ఈ సందర్భంగా ప్రముఖ దర్శకుడు బోయపాటి శ్రీనివాస్ ఈ చిత్ర రెండో ట్రైలర్‌ను విడుదల చేశాడు.
అనంతరం బోయపాటి మాట్లాడుతూ.. "సినిమా వారికి ఉత్తరాంధ్ర వాళ్లు ఇచ్చే గౌరవం.. చూపే అభిమానం ఏరోజుకీ మర్చిపోలేనిది. ఎక్కడా చూడలేనిది. అందుకే ఎన్నో అవకాశాలు ఉన్నా, ఇక్కడే ఫంక్షన్స్‌ జరుపుతాం. షూటింగ్‌లు కూడా చేస్తాం. ఇక్కడి ప్రాంత వాసుల్లో పాజిటివ్‌నెస్‌ ఉంటుంది. గతంలో 'జైసింహా'తో వచ్చిన కె.ఎస్‌.రవికుమార్ మరోసారి అద్భుతమైన చిత్రంతో రాబోతున్నారు. ఇది తప్పకుండా విజయం సాధించాలని కోరుకుంటున్నా. 'రూలర్' టైటిల్‌ బాలయ్యబాబుకి సరిగ్గా సరిపోతుంది. "బాలయ్య రూలర్ ఆఫ్‌ ది ఆర్ట్స్‌.. రూలర్ ఆఫ్‌ ది హార్ట్స్‌.." ఎందుకంటే ఆయనకు ఒక పాత్ర వస్తే దానికి లొంగిపోతారు. కానీ, ఒకసారి ఆ పాత్రలోకి ప్రవేశించిన తర్వాత ఆ పాత్రను వంచుతారు. అలాగే అభిమానులకు కష్టం వస్తే ఆయన ముందుంటారు. అంతా అభిమానులపై ప్రేమ చూపుతారు. ఆయన అభిమానులు మాదిరిగానే నేను కూడా 'రూలర్' సినిమా కోసం వేచి చూస్తున్నా" అని అన్నాడు.
నటుడు రాజశేఖర్ మాట్లాడుతూ.. "నేను కేవలం బాలకృష్ణ కోసమే ఈ కార్యక్రమానికి వచ్చా. నేను చిత్ర పరిశ్రమకు వచ్చినప్పటి నుంచి నన్ను వెన్ను తట్టి ప్రోత్సహించే వారిలో ఆయన కూడా ఉంటారు. బాలకృష్ణ తండ్రి ఒక రూలర్.. ఆయన నుంచి ఎన్నో నేర్చుకున్న బాలకృష్ణ కూడా అలాగే అయ్యారు. సాధారణంగా సంక్రాంతికి తన కొత్త సినిమాతో వచ్చే బాలకృష్ణ ఆ సీజన్‌ మొత్తం రూల్‌ చేస్తారు. అలాంటిది ఈ సారి సంక్రాంతి కన్నా ముందే వచ్చి అప్పటివరకూ రికార్డులను రూల్‌ చేయడానికి సిద్ధమవుతున్నారు. ఒక 'రూలర్'.. మరో 'రూలర్' సినిమాతో రావడం నిజంగా అద్భుతం" అన్నాడు.
ఇవీ చూడండి.. బాలయ్య అరుపులకు అభిమానుల ఖుష్
