నందమూరి అభిమానులు, సినీప్రియులకు తన జన్మదినం సందర్భంగా అదిరిపోయే కానుక అందించబోతున్నారు కథానాయకుడు బాలకృష్ణ. ఈనెల 10న ఆయన పుట్టినరోజు. ఈ సందర్భంగా అభిమానులకు తన కొత్త చిత్రం నుంచి ఓ కానుకను అందించబోతున్నారు బాలయ్య.
ప్రస్తుతం బాలయ్య తన 106వ చిత్రాన్ని బోయపాటి శ్రీను దర్శకత్వంలో చేస్తున్నారు. ఇప్పటికే ఓ షెడ్యూల్‌ చిత్రీకరణ పూర్తయింది. అయితే ఈ చిత్ర టైటిల్, ఫస్ట్‌లుక్‌తో పాటు ఓ పాటను చిత్రబృందం విడుదల చేసేందుకు సన్నద్ధమవుతున్నట్లు టాక్.
మరో విశేషమేమిటంటే.. ఆ పాటను ఆలపించింది స్వయంగా బాలయ్యేనట. ఆయన గతంలో పూరి జగన్నాథ్‌ దర్శకత్వంలో వచ్చిన 'పైసా వసూల్‌' చిత్రం కోసం 'మామా ఏక్‌ పెగ్‌లా' అనే గీతాన్ని ఆలపించి మెప్పించారు. ఇప్పుడు మరోసారి బోయపాటి చిత్రం కోసం గొంతు సవరించుకున్నట్లు తెలుస్తోంది. ఇప్పటికే ఈ సాంగ్ రికార్డింగ్‌ కూడా పూర్తయినట్లు సమాచారం. తాజాగా దీనికి గురించి బాలయ్య ఓ ఇంటర్వ్యూలో చిన్న హింట్‌ ఇచ్చారు.
"త్వరలో మళ్లీ నా పాటతో సామాజిక మాధ్యమాల్లో సందడి చేయబోతున్నా. దీనికి పెద్దగా సమయం కూడా తీసుకోవాలనుకోవట్లేదు. మరో నాలుగైదు రోజులంతే" అంటూ పాటపై క్లూ ఇచ్చారు బాలకృష్ణ. ఈ చిత్రం కోసం 'మోనార్క్‌' అన్న టైటిల్‌ను పరిశీలిస్తున్నట్లు సమాచారం.
ఇదీ చూడండి : ముజఫర్పుర్ బాలుడ్ని దత్తత తీసుకున్న షారుక్
