సూపర్స్టార్ మహేశ్ బాబుతో బాలీవుడ్‌ నటుడు అనిల్ కపూర్ తలపడనున్నాడని టాలీవుడ్‌లో ప్రచారం ఊపందుకుంది. మహేశ్ కథానాయకుడిగా పరశురామ్ 'సర్కారు వారి పాట' అనే సినిమాను తెరకెక్కిస్తున్నాడు. ఈ చిత్రంలో విలన్‌ పాత్ర చాలా ప్రత్యేకంగా ఉంటుందని టాక్‌. దీని కోసం ఇప్పటికే కొందరు ప్రతినాయకుల్ని సంప్రదించిన చిత్రబృందం తాజాగా అనిల్ కపూర్‌ని కలిసిందని వినిపిస్తోంది.
అనిల్‌కు దర్శకుడు కథ చెప్పాడట. మహేశ్తో కలిసి నటించేందుకు అనిల్ సుముఖంగా ఉన్నాడని, కథ అతడికి బాగా నచ్చిందంటూ ఊహాగానాలు వినిపిస్తున్నాయి. త్వరలోనే ఈ విషయంపై స్పష్టత రానుంది. ఏది ఏమైనా ఈ కాంబినేషన్ అనగానే సినీ అభిమానుల్లో అంచనాలు భారీగా పెరిగాయి.
ఈ చిత్రంలో మహేశ్ సరసన కీర్తి సురేశ్‌ నటిస్తోంది. తమన్‌ సంగీతం అందిస్తున్నాడు. ఈ ఏడాది చివర్లో సెట్స్‌పైకి వెళ్లనుంది. ఇప్పటికే విడుదలైన ప్రీ లుక్, మోషన్‌ పోస్టర్లు సినిమాపై ఆసక్తి పెంచుతున్నాయి.
