అందం అనే మాటకే సరికొత్త నిర్వచనం చెప్పిన ప్రపంచ సుందరి. ర్యాంపుపై నడకతో, తన నీలికళ్లతో, సినిమాల్లో నటనతో ఎందరో అభిమానులను ఆకట్టుకున్న వయ్యారి భామ. తనదైన అభినయంతో కోట్లాది మంది కుర్రకారు మనసుల్ని కొల్లగొట్టేసింది. ఆ అందాల రాశి ఐశ్వర్యరాయ్ బచ్చన్ నేడు 46వ వసంతంలోకి అడుగుపెట్టింది.
కన్నడ సుందరి...
కర్నాటకలోని మంగుళూరులో 1973 నవంబర్ 1న పుట్టింది ఐశ్వర్యరాయ్. తులు మాట్లాడే కుటుంబంలో కృష్ణరాజ్రాయ్, బృందారాయ్కి జన్మించిందీ అమ్మడు. ఈమెకు ఆదిత్యరాయ్ అనే సోదరుడు ఉన్నాడు. అతను మర్చెంట్ నేవీలో ఇంజనీర్. చిన్నతనం నుంచి ముంబయిలోనే పెరిగిన ఈ భామ... చదువుతూనే సంగీతం, సంప్రదాయ నృత్యాన్ని ఐదేళ్లు అభ్యసించింది.
మోడల్ అవ్వాలని అనుకోలేదు...
చదువులో టాపర్ అయిన ఈ అమ్మడు... మాతుంగలోని ఆర్య విద్యామందిర్, జైహింద్ కాలేజ్, డి.జి.రూపరెల్ కళాశాలల్లో విద్యాభ్యాసం చేసింది. మొదట డాక్టర్ కావాలనుకొంది. మధ్యలో లక్ష్యం మార్చుకొని ఆర్కిటెక్చర్ కావాలని నిర్ణయించుకొంది. ఆ రంగంలో కొన్నాళ్లపాటు పార్ట్టైమ్ జాబ్ కూడా చేసింది. కానీ ఆమె అందం మోడలింగ్ రంగంలోకి ప్రవేశించేలా చేసింది. 1991లో ఓ సంస్థ నిర్వహించిన సూపర్మోడల్ కాంటెస్ట్లో పాల్గొని విజేతగా నిలిచింది. ఆ తరువాత పలు సంస్థలకి మోడల్గా వ్యవహరించింది.
మొదటిసారే ఆమిర్తో...
1993లో ఆమిర్ఖాన్తో కలిసి ఓ ప్రకటనలో నటించింది ఐష్. ఆ తర్వాత చిత్ర పరిశ్రమలో ఆమె పేరు మార్మోగిపోయింది. ప్రముఖ నిర్మాణ సంస్థలు, కథానాయకులు ఐష్ని తమ సినిమాల్లో హీరోయిన్గా ఎంచుకోవాలని ప్రయత్నించారు. కానీ ఆమె మాత్రం తనకి ఇష్టమైన ఆర్కిటెక్టింగ్ రంగంలోకి వెళ్లాలని సినిమా అవకాశాల్ని తిరస్కరించిందట.
మిస్ ఇండియా నుంచి మిస్ వరల్డ్...
1994లో మిస్ ఇండియా పోటీల్లో పాల్గొన్న ఐష్... అందులో రన్నరప్గా నిలిచింది. మరో బాలీవుడ్ నటి సుస్మితాసేన్ విజేతగా నిలిచింది. తర్వాత ఏడాది (1995)లో దక్షిణాఫ్రికాలో జరిగిన విశ్వ సుందరి పోటీల్లో పాల్గొంది. అందులో కిరీటం దక్కించుకొంది.
వెండితెరపై అరంగేట్రం...
మణిరత్నం తమిళంలో తీసిన 'ఇరువర్'తో తెరంగేట్రం చేసింది. ఆ చిత్రం తెలుగులో 'ఇద్దరు'గా విడుదలైంది. అందులో ఐశ్వర్యారాయ్ పుష్పవల్లి, కల్పన పేర్లతో ద్విపాత్రాభినయం చేసింది. అదే ఏడాది 'ఔర్ప్యార్ హో గయా' చిత్రం ద్వారా హిందీ తెరకు పరిచయమైంది. అయితే ఆ చిత్రం పెద్దగా ఆడలేదు. 1998లో శంకర్ తీసిన 'జీన్స్'లో అవకాశాన్ని అందుకొని... మధుమిత పాత్రలో చక్కటి అభినయాన్ని ప్రదర్శించింది.
- " class="align-text-top noRightClick twitterSection" data="">
అంతర్జాతీయ గుర్తింపు...
హిందీలో 'హమ్ దిల్ దే చుకే సనమ్' తర్వాత ఐష్కి అభిమానులు భారీగా పెరిగారు. ఆ చిత్రం పెద్ద విజయం సాధించింది. ఆ తరువాత 'తాల్','హమ్ కిసీ సే కమ్ నహీ' లాంటి చిత్రాల్లో నటించి అలరించింది. ఆమెకి అంతర్జాతీయ స్థాయిలోనూ గుర్తింపు రావడానికి 'దేవదాస్' ఓ కారణం. అందులో పారూ పాత్రలో మైమరపించింది. ఆ చిత్రం కేన్స్ చలన చిత్రోత్సవంలో ప్రదర్శితమైంది. ఆ తరువాత ఐశ్వర్యారాయ్కి అంతర్జాతీయ ప్రాజెక్టుల్లో అవకాశాలు కూడా లభించాయి. 'బ్రైడ్ అండ్ ప్రెజిడ్యూస్', 'మిసెస్ ఆఫ్ స్పైసెస్','ప్రొవోక్డ్ట, 'ది లాస్ట లెజియన్' తదితర హాలీవుడ్ చిత్రాల్లో నటించింది.
సల్మాన్తో డేటింగ్..
వ్యక్తిగత జీవితంలో కొన్ని ఒడుదొడుకులనూ ఎదుర్కొంది. 1999లో సల్మాన్ఖాన్తో ప్రేమలో పడింది. ఇద్దరూ కలిసి డేటింగ్ చేశారని అప్పట్లో ప్రచారం సాగింది. అయితే ఇద్దరి మధ్య బంధం ఎంతో కాలం కొనసాగలేదు. 2001లో ఇద్దరూ విడిపోయారు. ఆ తరువాత కొన్నాళ్లకు వివేక్ ఒబెరాయ్తో ప్రేమలో పడినట్టు వార్తలొచ్చాయి.
'ధూమ్2' కలిపింది..
అభిషేక్ బచ్చన్తో కలిసి 'ధూమ్2'లో నటిస్తున్న సమయంలో ఇద్దరి మధ్య అనుబంధం పెరిగింది. అది ప్రేమగా మారింది. పెళ్లి చేసుకోవాలని నిర్ణయించుకొన్నారు. 2007 జనవరి 14న ఐష్-అభిషేక్ ఇద్దరూ పెళ్లి చేసుకోబోతున్నట్టు అమితాబ్ బచ్చన్ ధ్రువీకరించారు. అదే ఏడాది ఏప్రిల్ 16న అమితాబ్ బచ్చన్ సొంతిల్లు ప్రతీక్షలో పరిమిత సంఖ్యలో అతిథుల మధ్య అంగరంగ వైభవంగా పెళ్లి జరిగింది. 2011 నవంబరు 16న ఐశ్వర్యారాయ్ ఓ పాపకి జన్మనిచింది. నాలుగు నెలల తరువాత ఆ పాపకి 'ఆరాధ్య' అని పేరు పెట్టారు.
- " class="align-text-top noRightClick twitterSection" data="">
ఆసక్తికర విషయాలు...
- కేన్స్ చలన చిత్రోత్సవం అవార్డుల జ్యూరీ కమిటీ సభ్యురాలిగా ఎంపికైన తొలి భారతీయ నటి ఐశ్వర్యారాయ్.
- తొమ్మిదో తరగతి చదువుతున్నప్పుడే పెన్సిల్కి సంబంధించిన ఓ ప్రకటనలో ఐశ్వర్యారాయ్ నటించిందట.
- ఐశ్వర్యారాయ్ కథానాయిక కాక మునుపే ప్రముఖ కథానాయిక రేఖ గుర్తుపట్టి పలకరించిందట. ప్రకటనల్లో చాలా అందంగా కనిపిస్తున్నావని భుజం తట్టి ప్రోత్సహించిందట.
- దుబాయ్లో ఒక రోజంతా ట్రాఫిక్ జామ్ కావడానికి ఐశ్వర్యారాయ్ కారణమైందట. ఓ ప్రకటనలో నటించడానికని దుబాయ్ వెళ్లిందట. ఆ సమయంలో అభిమానులు ఆమెని చూసేందుకు భారీగా రావడం వల్ల అక్కడ రోజంతా ట్రాఫిక్ జామ్ అయ్యిందట.
- పెళ్లైన తరువాత చాలా తక్కువ చిత్రాల్లో నటించింది. వాటిల్లో 'సర్బజిత్', 'ఏ దిల్ ముష్కిల్ హై', 'ఫన్నేఖాన్'. అప్పుడప్పుడు వాణిజ్య ప్రకటనల్లో మెరుస్తుంది. ఇటీవల 'కేన్స్ఫిల్మ్ ఫెస్టివల్స్'లో పాల్గొని తన అందచందాలతో సందడి చేసింది.
- ఐశ్వర్యారాయ్ గర్భవతి అని తెలిసిన సమయంలో బాలీవుడ్లో ఓ వివాదం సాగింది. అప్పటికే ఆమె 'హీరోయిన్' అనే సినిమాలో నటిచేందుకు సంతకం చేసింది. చిత్రం సెట్స్పైకి వెళ్లే సమయంలో ఐశ్వర్యారాయ్ ప్రాజెక్టు నుంచి బయటికొచ్చింది. ఆమె ఐదు నెలల గర్భవతినని చెప్పడం వల్ల నిర్మాతలు అసంతృప్తి వ్యక్తం చేశారు. ఐష్ గర్భవతి అన్న విషయాన్ని దాచిపెట్టిందని, సినిమా ఆలస్యానికి కారణమైందని వాళ్లు ఆరోపించారు.
- మణిరత్నం దర్శకత్వంలో 'పొన్నియన్ సెల్వన్' అనే చిత్రం తెరకెక్కనుంది. ఇందులో ఐశ్వర్యరాయ్, అమితాబ్ బచ్చన్, విక్రమ్, అనుష్క తదితరులు నటిస్తున్నారు.