విజయ్ దేవరకొండ.. అచ్చమైన తెలంగాణ యాసలో మాట్లాడుతూ మంచి క్రేజ్ దక్కించుకున్నాడు. వేరే హీరోల చేతుల నుంచి మారొచ్చిన కథలతో బ్లాక్బస్టర్ విజయాలు అందుకున్నాడు. విజయ్ కెరీర్కు ఊపునిచ్చిన 'పెళ్లిచూపులు', 'అర్జున్రెడ్డి', గీతగీవిందం', 'టాక్సీవాలా' వంటి చిత్రాలన్నీ తొలుత వేరే కథానాయకుడి దగ్గరకు వెళ్లొచ్చినవే. అందుకే ఈ హీరో నుంచి ఓ సినిమా వస్తుందంటే ఆ కథకు అంతకుముందు ఏ హీరో నో చెప్పాడా? అని అభిమానులు ఆరా తీస్తున్నారు.
తాజాగా విజయ్ నుంచి వచ్చిన 'వరల్డ్ ఫేమస్ లవర్' చిత్రం కూడా ఈ హీరోకు అలా వచ్చిందే. దర్శకుడు క్రాంతి మాధవ్‌ ముందుగా ఈ కథను నాని, శర్వానంద్, సాయితేజ్ వంటి యువ హీరోలకు వినిపించాడు. వాళ్లకెందుకో ఈ స్ర్కిప్ట్ నచ్చకపోవడం వల్ల ఆ కథ దేవరకొండ దగ్గరకు వచ్చింది. ఇటీవల ఈ విషయం బయటకు రాగానే విజయ్ మరోసారి సెంటిమెంట్‌తో మ్యాజిక్‌ చేస్తాడేమోనని అంతా భావించారు. కానీ, తాజాగా చిత్ర ఫలితం చూశాక ఆ సెంటిమెంట్ బ్రేక్ అయినట్లనిపిస్తోంది.
ప్రేమికుల రోజు కానుకగా ప్రేక్షకుల ముందుకొచ్చిన ఈ చిత్రానికి తొలిరోజు నుంచి మిశ్రమ స్పందన లభిస్తోంది. బాక్సాఫీస్‌ వద్ద దీనికి మరో చిత్రంతో పోటీ లేకపోవడం వల్ల వసూళ్ల పరంగా ఫర్వాలేదనిపిస్తోంది. ప్రస్తుతం ఈ ఫలితం చూసి నాని.. శర్వా.. తేజులు 'వరల్డ్ ఫేమస్ లవర్'ను వదులుకుని మంచి నిర్ణయమే తీసుకున్నారని సినీప్రియులు అభిప్రాయపడుతున్నారు.
ఇక ప్రస్తుతం రౌడీ హీరో చూపంతా 'ఫైటర్‌'పైనే ఉంది. పూరి జగన్నాథ్‌ దర్శకత్వంలో తెరకెక్కుతోన్న ఈ పాన్‌ ఇండియా చిత్రం ప్రస్తుతం సెట్స్‌పై ముస్తాబవుతోంది.
ఇదీ చదవండి: యువకుడి ప్రతిభకు 'విజయ' సాయం
