నటి విద్యుల్లేఖ రామన్‌ త్వరలోనే పెళ్లి కూతురుగా దర్శనమివ్వబోతున్నారు. తమిళ, తెలుగు చిత్రాల్లో తన నటన, కామెడీ టైమింగ్‌తో ప్రేక్షకులను అలరిస్తున్న ఆమె ఇటీవలే నిశ్చితార్థం చేసుకున్నారు. గతకొంతకాలంగా ఫిట్నెస్ నిపుణులు, న్యూట్రీషియన్‌ అయిన సంజయ్‌తో ఆమె ప్రేమలో ఉన్నట్లు తెలుస్తోంది. ఈ నేపథ్యంలోవఇరు కుటుంబాల అంగీకారంతో వీరు ఒక్కటి కాబోతున్నారు. సంజయ్‌తో రోకా వేడుకకు సంబంధించిన ఫొటోలను ఆమె తన ఇన్‌స్టా వేదికగా పంచుకున్నారు.
"మేం రోకా చేసుకున్నాం. ఆగస్టు 26న ఈ వేడుక జరిగింది. అతికొద్దిమంది కుటుంబ సభ్యులు, సన్నిహితులు మాత్రమే దీనికి హాజరయ్యారు. మేమందరం మాస్క్‌లు ధరించి, ఫొటోల కోసం వాటిని తీసి, మళ్లీ వేసుకున్నాం. మాకు శుభాకాంక్షలు తెలిపిన వాళ్లందరికీ ధన్యవాదాలు" అని విద్యుల్లేఖ పేర్కొన్నారు.
ఈ సందర్భంగా సినీ ప్రముఖులు ఆమెకు శుభాకాంక్షలు తెలిపారు. వరుణ్‌ తేజ్‌ 'కంగ్రాట్స్‌ అక్కా' అని కామెంట్‌ చేయగా, రాశీఖన్నా 'హే క్యూటీస్‌' అని పేర్కొన్నారు. సాయి తేజ్‌, నిధి అగర్వాల్‌, పాయల్‌ రాజ్‌పుత్‌, తేజస్వీ, ధన్యబాలకృష్ణన్‌, రుహానీశర్మ తదితరులు శుభాకాంక్షలు తెలిపారు.
బొద్దుగా కనిపించే విద్యుల్లేఖ లాక్‌డౌన్‌ సమయాన్ని చక్కగా సద్వినియోగం చేసుకున్నారు. షూటింగ్‌లు లేకపోవడం వల్ల ఫిట్‌నెస్‌పై దృష్టి పెట్టి, బరువు తగ్గారు. అందుకు సంబంధించిన వీడియోలు, ఫొటోలను కూడా అభిమానులతో పంచుకున్నారు.
