Whatsapp New Features 2023 : ప్రముఖ మెసేజింగ్ యాప్ వాట్సాప్.. తమ వినియోగదారుల కోసం ఎప్పటికప్పుడు కొత్త అప్డేట్లు తీసుకువస్తునే ఉంటుంది. కాలానుగుణంగా, వినియోగదారుల అభిరుచికి త‌గ్గ‌ట్లుగా మార్పులు చేర్పులు చేస్తూ వ‌స్తోంది. ఇప్పటికే పలు ఫీచర్లను ప్రవేశపెట్ట‌గా.. తాజాగా మరో రెండింటిని అందుబాటులోకి తీసుకురానుంది. ఇకపై గ్రూపుల్లో వచ్చే అనుచిత మెసేజ్లపై రిపోర్టు చేయడం, అపరిచిత నంబర్ల నుంచి వచ్చే కాల్స్ సైలెంట్గా ఉంచే వీలు కల్పించేలా వాటిని రూపొందించింది.
వాట్సాప్ వెబ్ ఇన్ఫో వివరాల ప్రకారం.. అడ్మిన్ రివ్యూ అని పిలిచే ఈ ఫీచర్ లో.. గ్రూపుల్లో ఎవరైనా అనుచిత మెసేజులు పంపిస్తే.. దాన్ని ఆ గ్రూపు అడ్మిన్కు ఫిర్యాదు చేయవచ్చు. సభ్యులు ఒక నిర్దిష్ట సందేశాన్ని అనుచితంగా, అసభ్యకరంగా ఫిర్యాదు చేసిన‌ప్ప‌డు.. అది సమీక్ష నిమిత్తం అడ్మిన్కు ఫార్వార్డ్ అవుతుంది. అది అభ్యంత‌క‌ర‌మ‌ని భావిస్తే అప్పుడు అడ్మిన్ దాన్ని తొలగించవచ్చు. ఈ నూతన ఫీచర్ గ్రూపు పేజీల సెట్టింగ్స్లో ఉంది. పైగా దీన్ని ఆ గ్రూపు అడ్మిన్లు మాత్రమే ఎనేబుల్ చేసే అవకాశముంది.
దీంతో పాటు డెవలపర్లు మరో ఫీచర్ పైనా వర్క్ చేస్తున్నారు. అనుచిత, అపరిచితుల నుంచి వచ్చే ఫోన్ కాల్స్ను సైలెంట్లో ఉంచేందుకు వీలుగా దీన్ని డెవలప్ చేస్తున్నారు. ఇది వాట్సాప్ సెట్టింగ్స్లోని ప్రైవసీ సెక్షన్లో ఉంటుంది. ఎవరికైనా తెలియని నంబర్ల నుంచి ఫోన్లు వచ్చినప్పుడు వినియోగదారులు వాటిని మ్యూట్ చేసుకోవచ్చు. కానీ.. ఆ కాల్స్ నోటిఫికేషన్లో కనిపిస్తుంది.
ఈ రెండు ఫీచర్లలో.. గ్రూపుల్లో వచ్చే అనుచిత మెసేజులపై ఫిర్యాదు చేసే ఫీచర్ టెస్టింగ్ దశలో ఉంది. రాబోయే రోజుల్లో దీన్ని మరింత మంది వినియోగదారులకు అందించాలని డెవలపర్లు ప్రయత్నాలు చేస్తున్నారు. ఇక రెండోదైన అపరిచిత నంబర్ల నుంచి వచ్చే కాల్స్ను మ్యూట్ చేసే ఫీచర్.. వాట్సాప్ తాజా వెర్షన్లో బీటా వినియోగదారులకు ఇప్పటికే అందుబాటులో ఉంది.
కొన్ని రోజుల క్రితమే మొత్తం వాట్సాప్కే లాక్ వేయకుండా.. మనకు కావాల్సిన చాట్లకు లాక్ వేసుకునే ఫీచర్ను తీసుకురావాలని ప్రయోగాలు చేపట్టింది. వారం రోజుల క్రితం పోల్ ఫీచర్లో కొత్త ఫంక్షనాలిటీలు, ఫొటోలు, డాక్యుమెంట్లు క్యాప్షన్లతో పాటు ఫార్వార్డ్ చేయడం లాంటివి తెచ్చింది. వినియోగదారుల భ‌ద్ర‌త‌ను దృష్టిలో ఉంచుకుని.. వారు పంపే సందేశాల‌ను థర్డ్ పార్టీ చ‌ద‌వ‌కుండా ఎండ్ టు ఎండ్ ఇన్ క్రిప్ష‌న్ సౌక‌ర్యాన్ని తెచ్చింది.
