'జియోమీట్' వీడియో కాన్ఫరెన్స్ను మరింత సురక్షితం చేసేందుకు... అదనపు భద్రతా ఫీచర్లను జోడించింది రిలయన్స్. జూమ్ లాంటి యాప్లపై హ్యాకర్లు దాడి చేసి అశ్లీల చిత్రాలను పోస్టు చేస్తున్న నేపథ్యంలో... రిలయన్స్ అప్రమత్తమైంది. హ్యాకింగ్ బెడద నుంచి జియోమీట్ను మరింత సురక్షితం చేయడమే లక్ష్యంగా ఆరు అదనపు భద్రతా ఫీచర్లను జోడించింది.
మరింత సురక్షితం
- 24 గంటలపాటు ఉచిత వీడియో కాన్ఫరెన్సింగ్ సౌకర్యం కల్పిస్తున్న జియోమీట్లో ప్రవేశించాలంటే ఎన్క్రిప్టెడ్ పాస్వర్డ్తో సైన్-ఇన్ కావాల్సిందే.
- తమ గుర్తింపును బహిర్గతం చేయకుండా లేదా సైన్ ఇన్ చేయకుండా ఎవరైనా వీడియో కాన్ఫరెన్స్లో పాల్గొనడానికి ప్రయత్నిస్తే... హోస్ట్ వారిని తొలగించవచ్చు.
- జియోమీట్ వినియోగదారులు ప్లేస్టోర్లో ఈ యాప్ను అప్డేట్ చేసుకోవచ్చు. త్వరలో ఐఓఎస్ వినియోగదారులకు కూడా ఇది అందుబాటులోకి రానుంది.
- వినియోగదారులు తమ ప్రస్తుత యూజర్ ఐడీ, పాస్వర్డ్లతో... ఈ అప్డేటెడ్ యాప్లో సైన్ ఆన్ కావచ్చు.
- కొత్త ఫీచర్ల సాయంతో.. వ్యక్తిగత సమావేశ గదులు (పర్సనల్ మీటింగ్ రూమ్స్) ఏర్పాటుచేసుకుని సురక్షిత పాస్వర్డ్ సెట్ చేసుకోవచ్చు. ఫలితంగా పాఠశాల తరగతులు, రోజువారీ సమావేశాల నిర్వహణ మరింత సులభతరం అవుతుంది.
- జియోమీట్ వినియోగదారుడు.. పార్టిసిపెంట్ వీడియోపై డబుల్ క్లిక్ చేయడం ద్వారా... మరింత మందిని తన వీడియో కాన్ఫరెన్స్లో చేర్చుకోవచ్చు లేదా పిన్ చేసుకోవచ్చు.
- స్థిర ప్రదేశాల్లో ఉంటూ బహుళ కార్యాలయాలతో అనుసంధానం కోసం... ఎంటర్ప్రైజ్ కస్టమర్లు ఉపయోగించే సంప్రదాయ వీడియో కాన్ఫరెన్స్ సౌకర్యం కూడా జియోమీట్లో ఉంది.
- సంస్థల యాజమాన్యాలు.... కార్యాలయంలోనూ, అలాగే ఇంటి నుంచి పనిచేస్తున్న తమ ఉద్యోగులతోనూ... ఒకేసారి అనుసంధానం అయ్యే అవకాశాన్ని జియోమీట్ కల్పిస్తుంది.
- ప్రధాన యూజర్ ఇప్పుడు ప్రధాన సమావేశం నుంచి నిష్క్రమించకుండానే.. ఇతర సహోద్యోగులతోనూ సమావేశం కాగలరు.
జూమ్ వర్సెస్ జియోమీట్
రిలయన్స్ ఇండస్ట్రీస్.. జులై 2న జియోమీట్ను ప్రారంభించింది. దీనితో ఒకేసారి 100 మందితో వీడియో కాన్ఫరెన్స్ నిర్వహించవచ్చు. హెచ్డీ ఆడియో, వీడియో కాల్ నాణ్యత దీని సొంతం. దీనిలో స్క్రీన్ షేరింగ్, మీటింగ్ షెడ్యూల్ ఫీచర్లు ఉన్నాయి.
ప్రస్తుతం జియోమీట్ను మరింత ఆకర్షణీయంగా మార్చేందుకు... యూజర్ ఇంటర్ఫేస్ను సరికొత్తగా మార్చింది రిలయన్స్.
- జూమ్లో వీడియో కాన్ఫరెన్స్ కాలపరిమితి 40 నిమిషాలు మాత్రమే ఉండగా.. జియోమీట్ 24 గంటలపాటు ఉచితంగా ఈ సేవలు అందిస్తోంది.
- జియోమీట్లో... హోస్ట్ అనుమతి ఉన్నవారు మాత్రమే వీడియో కాన్ఫరెన్స్లో పాల్గొనేందుకు అవకాశం ఉంటుంది. అంటే హ్యాకర్లు దీనిలో ప్రవేశించకుండా భద్రత ఉంటుంది.
- జూమ్ యాప్లో వేరే కాల్ తీసుకోవాలంటే.. వీడియో కాన్ఫరెన్స్ నుంచి బయటకు రావాల్సి ఉంటుంది. జియోమీట్లో మాత్రం కాల్ డ్రాప్ చేయనక్కరలేదు. సులభంగా ఒక డివైస్ నుంచి మరో డివైస్కు మారవచ్చు.
- జూమ్లో ఈ-మెయిల్ ఐడీతో మాత్రమే సైన్ అప్ కాగలం. అదే జియోమీట్లో ఈ-మెయిల్తో పాటు మొబైల్ నెంబర్తోనూ సైన్ అప్ కావచ్చు.
- జూమ్లో ఒక మొబైల్ స్క్రీన్లో నలుగురు మాత్రమే కనిపిస్తారు. ఎక్కువ మంది పాల్గొనాల్సి వస్తే మల్టిపుల్ పేజీల్లో మిగతా వారిని చూడాల్సి ఉంటుంది. అదే జియోమీట్లో అయితే ఒక స్క్రీన్లో ఒకేసారి 9 మందిని చూడొచ్చు.
ఉచితంగా
కరోనా విజృంభణ వేళ.. జూమ్, మైక్రోసాఫ్ట్ టీమ్స్, సిస్కో వెబెక్స్, గూగుల్ మీట్ సహా ఇతర సంస్థల వీడియో కాన్ఫరెన్సింగ్ యాప్లు తీసుకొచ్చాయి. వీటికి పోటీగా జియోమీట్ను అందుబాటులోకి తీసుకొచ్చింది రిలయన్స్. మిగతా వెబ్ కాన్ఫరెన్సింగ్ యాప్లు ఈ సదుపాయానికి కొంత సొమ్ము వసూలు చేస్తుండగా.. జియోమీట్ మాత్రం ఈ సేవలను పూర్తి ఉచితంగా అందిస్తోంది.
ఇదీ చూడండి: గంగా శుద్ధికి ప్రపంచ బ్యాంకు 3 వేల కోట్ల సాయం
