ప్రపంచంలోనే అత్యంత ఖరీదైన కార్లలో ఒకటిగా.. అమెరికాకు చెందిన 'టెస్లా' గుర్తింపు పొందింది. అలాంటిది పొరపాటున కారుకు చిన్న గీతపడినా.. అంతే పరిస్థితి! రిపేరింగ్కు సైతం భారీ స్థాయిలో ఖర్చు తప్పదు. అమెరికాలో ఓ వ్యక్తికి ఇలాంటి పరిస్థితే ఎదురైంది. కారు రిపేర్ కోసం కంపెనీ సెంటర్కు వెళితే దిమ్మతిరిగే ధర చెప్పారు. ఏం చేయాలో అర్థంకాని స్థితిలో యజమాని ఉండగా.. ఓ యూట్యూబర్ ఆయన సమస్యను పరిష్కరించాడు. అది కూడా కంపెనీ చెప్పిన ధరకు 23రేట్లు తక్కువకే! ఈ కథ ఇప్పడు అమెరికాలో హాట్టాపిక్గా మారింది. అసలేం జరిగిందంటే...
'టెస్లా' చిక్కులు..
ఇటీవల ఓ వ్యక్తి కారులో సమస్య ఏర్పడింది. టెస్లా సర్వీస్ సెంటర్కు వెళ్లగా.. రిపేరు చేసేందుకు దాదాపు రూ.12 లక్షల వ్యయం అవుతుందని చెప్పారు.
"కారులోని బ్యాటరీ-కూలెంట్ అనుసంధాన మార్గంలో సమస్య తలెత్తగా.. టెస్లా సేవా కేంద్రాన్ని సంప్రదించాను. అయితే మొత్తం బ్యాటరీని మార్చాలని వారు సూచించారు. దీనికి 16వేల డాలర్లు ఖర్చవుతుందని అంచనా వేశారు. ఈ రిపేరింగ్కి బీమా వర్తించదని తెలిసి షాక్ అయ్యాను."
-వాహన యజమాని
ఈ స్థితిలో.. ఓ ఆన్లైన్ గ్రూప్ ద్వారా 'రిక్ రీబిల్డ్స్' అనే యూట్యూబ్ ఛానెల్ గురించి తెలిసింది. వెంటనే తన కారును ఆ ఛానెల్కు చెందిన రిచ్ బెనాయిట్ వద్దకు తీసుకెళ్లాడు ఆ యజమాని.
బెనాయిట్.. ఇంతకుముందే!
ఈ తరహా సమస్యను ఇతర టెస్లా కార్లలో గుర్తించినట్లు యూట్యూబర్ బెనాయిట్ తెలిపాడు. తన బృందంతో కలిసి ఇలాంటి సమస్యలకు ఇదివరకే పరిష్కారం చూపినట్లు వివరించాడు. ఇలా.. రూ. 52వేలకే పనిని పూర్తిచేసేశాడు.
"కేవలం 700 డాలర్లలోనే ఈ రిపేరింగ్ని చేయగలిగాను. ఇది టెస్లా సర్వీస్ సెంటర్ అంచనా వేసిన దానికంటే దాదాపు 23 రెట్లు తక్కువ."
-బెనాయిట్
ఈ వీడియోను బెనాయిట్ తన యూట్యూబ్ ఛానెల్లో అప్లోడ్ చేయగా.. అది కాస్తా వైరల్గా మారింది.
ఈ పూర్తి వ్యవహారంపై స్థానిక మీడియా 'టెస్లా'ను సంప్రదించేందుకు ప్రయత్నించింది. కానీ టెస్లా జవాబులేమీ ఇవ్వలేదు.
రైట్ టూ రిపేర్..
ప్రస్తుత సమస్య.. 'రైట్ టూ రిపేర్' ఉద్యమ ప్రాముఖ్యతను తెలియజేస్తోందని యూట్యూబర్ బెనాయిట్ తెలిపారు. వినియోగదారులు తమ వస్తువులను ఎక్కడైనా రిపేర్ చేయించుకునే విధంగా వెసులుబాటు కల్పించాలని.. అలా చేయకుండా నిరోధించే హక్కు కంపెనీలకు లేదని వాదించారు.
ఇవీ చదవండి:
