కరోనా విజృంభిస్తున్నా, ఇంటిపట్టునే ఉండలేని పరిస్థితి. బతుకుపోరులో బయటికి వెళ్లాల్సిందే. ఈ విపత్కర పరిస్థితుల్లో ముఖానికి మాస్కు, చేతిలో శానిటైజర్లే ఆయుధాలు. అయినా పూర్తిస్థాయిలో రక్షణ పొందుతున్నామా అన్నది ప్రశ్నార్థకమే. ఇలాంటి పరిస్థితుల్లో సుదీర్ఘకాలం ప్రభావవంతంగా పనిచేసే శానిటైజర్లను ఐఐటీ హైదరాబాద్ యువ పరిశోధకులు ఆవిష్కరించారు. ఆవిష్కరణతో సరిపెట్టకుండా. వాటిని ప్రజలకు అందుబాటులోకి తీసుకువస్తున్నారు.
అందుబాటు ధరల్లో..
మార్కెట్లలో చౌక హ్యాండ్ శానిటైజర్ల వల్ల ప్రయోజనం ఏమేరకు ఉంటుందో తెలియదు. అందుకే.. అందుబాటు ధరల్లో, ఎక్కువ సమయం సమర్థంగా వైరస్‌ను చంపగలిగే శానిటైజర్‌ను తయారుచేయాలని ఐఐటీ హైదరాబాద్ నిశ్చయించుకుంది. బయోమెడికల్ విభాగంలో అసోసియేట్ ప్రొఫెసర్‌గా విధులు నిర్వర్తించే జ్యోత్సినేడు గిరి బృందం శానిటైజర్ తయారీ కోసం పరిశోధన చేసింది. రోజుకు వంద లీటర్లకు పైగా శానిటైజర్ ఉత్పత్తి చేసి, ఉచితంగానే ప్రజలకు పంపిణీ చేయడం ప్రారంభించింది.
డబ్ల్యూహెచ్వో ఫార్ములాతో..
గతేడాది ఏప్రిల్‌లో దేశవ్యాప్తంగా లాక్‌డౌన్ అమల్లోకి వచ్చినప్పుడు, మా డైరెక్టర్ ప్రొఫెసర్ మూర్తికి ఓ ఆలోచన తట్టిందని విద్యార్థులు తెలిపారు. హ్యాండ్ శానిటైజర్లు స్థానికులకు, కొవిడ్ ఆసుపత్రులకు ఉచితంగా పంపిణీ చేయాలని అనుకున్నామని వెల్లడించారు. డబ్ల్యూహెచ్వో సిఫారసు చేసిన శానిటైజర్ ఫార్ములాను వినియోగించి, శానిటైజర్ తయారు చేయాలనుకున్నామని... దాన్ని వివిధ ఆసుపత్రులు సహా సంగారెడ్డి జిల్లావ్యాప్తంగా పంపిణీ చేయాలనుకున్నామని పేర్కొన్నారు.
నానో టెక్నాలజీ ఆధారంతో..
సాధారణ శానిటైజర్ ప్రభావం తాత్కాలికమే కావడంతో.. పనితీరు మెరుగుపరిచేందుకు జ్యోత్స్నెందు గిరి ఆధ్వర్యంలోని పరిశోధక బృందం విస్తృత స్థాయిలో పరిశోధన సాగించింది. నానో టెక్నాలజీ ఆధారంగా ప్రభావవంతంగా పనిచేసే శానిటైజర్ తయారీపై దృష్టి పెట్టారు. ఏడాది పాటు 700 నమూనాలు తయారుచేసిన తర్వాత డ్యూరోకియా పేరుతో 4ఉత్పత్తులను అవిష్కరించారు.
నాలుగు రకాలు..
వివిధ అవసరాలకు అనుగుణంగా, 4రకాల ఉత్పత్తులను రూపొందించారు పరిశోధకులు. నిమిషం వ్యవధిలో కరోనా వైరస్ సహా... ఏ ఇతర వైరస్, బ్యాక్టీరియాలనైనా అంతం చేయడం వీటి ప్రత్యేకత. డ్యూరోకియా-హెచ్ పేరుతో వీళ్లు తయారుచేసిన శానిటైజర్ వాడితే 24 గంటల పాటు రక్షణ ఉంటుంది. తరచూ తాకే ఉపరితలాలపై ఉపయోగించేందుకు డ్యూరోకియా-ఎస్ పేరుతో సర్‌ఫేస్ డిసిన్‌ఫెక్టెంట్ తయారుచేశారు. స్ప్రే చేసిన తర్వాత 35రోజుల వరకూ రక్షణ కల్పించడం దీని ప్రత్యేకత.
అలాంటి సాంకేతికతను అభివృద్ధి చేసే క్రమంలో ఎన్నో అంశాలు పరిగణనలోకి తీసుకోవాల్సి వచ్చిందని.. ఆల్కహాల్ ఆధారిత, అందుబాటు ధర, దీర్ఘకాలం పనిచేయగలగడం, వైరస్‌ను వెంటనే మట్టుబెట్టడం లాంటి అంశాలపై ప్రధానంగా దృష్టి పెట్టామని జ్యోతినేడు గిరి తెలిపారు. చాలా ఫార్ములేషన్స్‌పై ప్రయోగాలు చేశామని... త్వరలోనే ఈ ఉత్పత్తులు మార్కెట్లోకి త్వరలో రానున్నాయని వెల్లడించారు. మొత్తానికి విజయవంతంగా తయారుచేసినందుకు సంతోషంగా ఉందన్నారు.
రోజూ వాడే మాస్కులను సబ్బుతో ఉతికి, ఎండలో ఆరేస్తే... వాటిపై పేరుకున్న వైరస్ తొలగి పోతుంది సరే... మరి ముఖానికి పెట్టుకున్నంత సేపు మాస్కుపై వైరస్ ఉంటే ఎలా? దీనికి పరిష్కారంగా డ్యూరోకియా-ఎమ్ శానిటైజర్ రూపొందించింది ఐఐటీ పరిశోధక బృందం. దీన్ని ఒకసారి మాస్క్‌పై స్ప్రే చేస్తే.. ఉతికే వరకూ మాస్కుపై చేరే వైరస్‌ను ఎప్పటికప్పుడు సంహరిస్తుంది. చిన్నపిల్లల కోసం ప్రత్యేకంగా నీటి ఆధారిత డ్యూరోకియా-హెచ్-ఆక్వా శానిటైజర్ తయారు చేశారు.
కొనసాగుతున్న అమ్మకాలు..
కేంద్ర విద్యాశాఖ మంత్రి రమేశ్ పోక్రియాల్ ఈ శానిటైజర్లను ఆవిష్కరించారు. కియా బయోటెక్ పేరుతో కంపెనీ ప్రారంభించి.. మార్కెట్లోకి విడుదల చేశారు. సూపర్ మార్కెట్లు సహా.. అమెజాన్, ఫ్లిప్‌కార్ట్ లాంటి ఈకామర్స్ సంస్థల ద్వారానూ అమ్మకాలు కొనసాగిస్తున్నారు.
ఇదీ చూడండి: కరోనా కోరల్లో పసిప్రాణం.. కాపాడుకునేందుకు తల్లిదండ్రుల ఆరాటం
