ప్రముఖ ప్రొఫెషనల్ నెట్వర్కింగ్ ప్లాట్ఫామ్ లింక్డ్ఇన్లో మరోసారి డేటా లీకైనట్లు సమాచారం. 70 కోట్ల మంది లింక్డ్ఇన్ యూజర్ల డేటాను హ్యాకర్లు లీక్ చేసినట్లు తెలుస్తోంది. ఈ మొత్తం లింక్డ్ఇన్ యూజర్లలో 92 శాతానికి సమానం. లింక్డ్ఇన్కు ప్రస్తుతం 76 కోట్ల మంది యూజర్లు ఉన్నారు.
లీకైన యూజర్ల డేటాలో.. ఫోన్ నంబర్లు, పూర్తి అడ్రస్, జియోగ్రఫికల్ లొకేషన్, వేతనాలు వంటి వివరాలు ఉన్నట్లు ఓ నివేదిక ద్వారా తెలిసింది. ఇంతకు ముందు ఏప్రిల్లోనూ 50 కోట్ల లింక్డ్ఇన్ యూజర్ల డేటా లీకైంది. అప్పుడు యూజర్ల మెయిల్ ఐడీలు, ఫోన్ నంబర్లు, వర్క్ ప్లేస్, పూర్తి పేరు, వారి సామాజిక మాధ్యమాల ఐడీల వంటి వివరాలను హ్యాకర్లు లీక్ చేశారు. అప్పట్లో ఈ విషయాన్ని లింక్డ్ఇన్ కూడా ధ్రువీకరించింది.
తాజాగా లీకైన డేటాలో.. 70 కోట్ల యూజర్ల డేటాను హ్యాకర్లు డార్క్వెబ్లో అమ్మకానికి పెట్టినట్లు నివేదిక పేర్కొంది. శాంపిల్ కోసం 10 లక్షల మంది డేటాను అందుబాటులో ఉంచినట్లు వెల్లడించింది. ఈ శాంపిల్ ద్వారానే ఎలాంటి సమాచారం హ్యాకర్ల చేతికి దొరికిందో తెలిసింది.
ఇదీ చదవండి:ఈ టిప్స్తో మీ డిజిటల్ పేమెంట్స్ సేఫ్!
