దిగ్గజ టెక్ సంస్థ గూగుల్ కీలక నిర్ణయం తీసుకున్నట్లు తెలుస్తోంది. పాత ఆండ్రాయిడ్ ఫోన్లలో జీ-మెయిల్, యూట్యూబ్, గూగుల్ మ్యాప్స్ సహా పలు యాప్లను బ్లాక్ చేయనున్నట్లు సమాచారం. సాధారణంగా ఆండ్రాయిడ్ ఫోన్లను అప్డేట్ చేసుకోవచ్చు. అయితే కొందరు.. పాత ఫోన్లు ఆగిపోయేంత వరకు ఉపయోగించడానికి ఇష్టపడతారు. అటువంటి పాత ఆండ్రాయిడ్ ఫోన్లలో గూగుల్ అకౌంట్తో లింక్ అయి ఉన్న అన్ని యాప్లను నిలిపివేసేందుకు ప్లాన్ చేస్తున్నట్లు తెలుస్తోంది. ఈ ఆండ్రాయిడ్ ఫోన్లలో యూజర్లు తమ గూగుల్ అకౌంట్తో సైన్ఇన్ చేయకుండా నిరోధించే ప్రణాళికలను సంస్థ ఇప్పటికే చర్యలు ప్రారంభించింది. ఇటీవల ప్రముఖ మెసేజింగ్ యాప్ వాట్సప్ కూడా ఇటువంటి నిర్ణయాన్ని తీసుకుంది.
ఏ ఆండ్రాయిడ్ వెర్షన్లో..
గూగుల్ పరిచయం చేసిన ఆండ్రాయిడ్ వెర్షన్లకు ఏదైనా తీపి పదార్థం పేరును పెట్టడం ఆనవాయితీ. అయితే డిసెంబరు 2010లో జింజర్బ్రెడ్ వెర్షన్ను మార్కెట్లోకి విడుదల చేయగా.. దాదాపు 11 ఏళ్ల తర్వాత, ఇప్పుడు దానికి సంబంధించిన సేవలు ఆపేయాలని గూగుల్ నిర్ణయం తీసుకుంది. యూజర్ల భద్రత కోసం తాము ఈ నిర్ణయం తీసుకున్నట్లు గూగుల్ తెలిపింది.
ఎప్పటి నుంచి పనిచేయవు..
2017 ఫిబ్రవరిలో.. జింజర్బ్రెడ్ ఆండ్రాయిడ్ వెర్షన్లో గూగుల్ పే కాంటాక్ట్లెస్ పేమెంట్ పని చేయలేదు. దాని తర్వాత ఇప్పుడు ఈ దిగ్గజ సంస్థకు చెందిన యాప్స్ ఇకపై పనిచేయవని ప్రకటన ఇచ్చింది. ఈ ఏడాది సెప్టెంబరు 27 నుంచి ఆండ్రాయిడ్ 2.3 వెర్షన్లో జీ-మెయిల్, యూట్యూబ్, గూగుల్ మ్యాప్లలో సైన్ఇన్ అయ్యేందుకు వీలుండదు. ఒకవేళ ఆ రోజు నుంచి సదరు యాప్స్లో లాగిన్ అయినా.. ఎర్రర్ అని వస్తుందని గూగుల్ తెలిపింది. పైన చెప్పిన మూడు యూప్స్తో పాటు గూగుల్ ప్లేస్టోర్, గూగుల్ క్యాలెండర్ సేవలు కూడా ఆగిపోనున్నాయి.
ఇప్పుడేం చేయాలి?
ఈ యాప్స్ అన్నీ మళ్లీ మీ స్మార్ట్ఫోన్లలో పనిచేయాలంటే.. కనీసం ఆండ్రాయిడ్ 3.0 వెర్షన్కు అయినా అప్గ్రేడ్ అవ్వక తప్పదు. ఒకవేళ మీ మొబైల్ ఓఎస్ అప్డేట్ చేసేందుకు వీలులేకుంటే.. కొత్త ఫోన్ కొనుగోలు చేయడం మేలు.
ఇదీ చూడండి.. ఇంటర్నెట్ భద్రత కోసం గూగుల్ ఏబీసీలు!
