Data Leak ICMR : దేశంలోని దాదాపు 81.5 కోట్ల మంది పౌరులకు చెందిన సున్నితమైన డేటా ఇప్పుడు డార్క్‌వెబ్‌లో చక్కర్లు కొడుతోంది. దేశ చరిత్రలోనే ఇదే అతిపెద్ద డేటా లీక్ కావచ్చని నిపుణులు భావిస్తున్నారు. కొవిడ్‌ పరీక్షల సమయంలో ఇండియన్‌ కౌన్సిల్‌ ఆఫ్‌ మెడికల్‌ రీసెర్చ్(ఐసీఎంఆర్) సేకరించిన డేటాను దొంగిలించారు. కచ్చితంగా ఇది ఎక్కడి నుంచి లీకైందనే విషయం తెలియలేదు. దీనిపై సీబీఐ దర్యాప్తు చేపట్టినట్లు సమాచారం. 'Pwn0001' అనే హ్యాకర్‌ ఈ డేటాను అందుబాటులోకి తెచ్చాడు. అతడు ప్రదర్శించిన డేటా ఆధారంగా.. వీటిల్లో ఆధార్‌ కార్డ్‌, పాస్‌పోర్టుల సమాచారం, పేర్లు, ఫోన్‌ నంబర్లు, తాత్కాలిక, శాశ్వత చిరునామాలు ఉన్నాయి. ఈ సమాచారాన్ని ICMR కొవిడ్‌ పరీక్షల సమయంలో సేకరించిందని హ్యాకర్‌ చెబుతున్నాడు.
అక్టోబర్‌ 9వ తేదీన ఈ డేటా చౌర్యం తొలిసారి వెలుగులోకి వచ్చింది. అమెరికాకు చెందిన సైబర్ సెక్యూరిటీ, ఇంటెలిజెన్స్‌ సంస్థ ఈ డేటా లీక్ను గుర్తించింది. Pwn0001 అనే వ్యక్తి పలు వేదికలపై తన వద్ద 81.5 కోట్ల మంది డేటా ఉందని.. వీటిల్లో భారతీయుల ఆధార్‌-పాస్‌పోర్టు సమాచారం ఉందని అంటున్నాడు. అందుకు సంబంధించిన లక్ష ఫైల్స్‌ అతడి వద్ద ఉన్నట్లు సైబర్ నిపుణులు గుర్తించారు. వీటిల్లో వాస్తవాలను గుర్తించేందుకు కొన్నింటిని ఆధార్‌ వెరిఫికేషన్‌ ద్వారా చెక్‌ చేశారు. అదంతా నిజమైన డేటానే అని నిర్ధరించుకున్నారు.
ఈ లీకేజీపై 'ది కంప్యూటర్‌ ఎమర్జెన్సీ రెస్పాన్స్‌ టీమ్‌ ఆఫ్‌ ఇండియా' (సీఈఆర్‌టీ-ఐఎన్‌) తక్షణమే ఐసీఎంఆర్‌ను అప్రమత్తం చేసింది. కొవిడ్‌ పరీక్షల సమయంలో సేకరించిన డేటా వైద్య ఆరోగ్య శాఖ, ఐసీఎంఆర్, నేషనల్‌ ఇన్ఫర్మాటిక్స్ సెంటర్ల వద్ద పడి ఉందని.. దీంతో ఎక్కడి నుంచి ఈ డేటా లీకైందనే విషయం తెలుసుకోవడం కష్టంగా మారిందని నిపుణులు చెబుతున్నారు. ఈ ఘటనపై కేంద్ర ఐటీ శాఖ ఇప్పటి వరకు స్పందించలేదు. గతేడాది డిసెంబర్‌లో ఎయిమ్స్‌ దిల్లీలో కూడా కొన్ని కంప్యూటర్లను హ్యాకర్లు అధీనంలోకి తీసుకొని దాదాపు రూ.200 కోట్ల విలువైన క్రిప్టో కరెన్సీని డిమాండ్‌ చేశారు.
కొవిన్‌ పోర్టల్‌ సేఫ్.. డేటా లీక్ వార్తలను కొట్టిపారేసిన కేంద్రం
40 కోట్ల ట్విట్టర్ యూజర్ల డేటా చోరీ.. సుందర్ పిచాయ్, డబ్ల్యూహెచ్ఓ సహా..
ట్విట్టర్లో భారీగా డేటా చౌర్యం.. అమ్మకానికి 50 లక్షల ఖాతాల వివరాలు!
