Techcrunch Report On Cyber Security : ఆండ్రాయిడ్ మొబైల్ యూజర్స్కు ఓ పెద్ద చిక్కు వచ్చి పడింది. హానికరమైన యాప్గా పేర్కొంటున్న స్టాక్వేర్ యాప్ను ఇన్స్టాల్ చేసుకుని వినియోగిస్తున్న దాదాపు 60 వేల మంది ఆండ్రాయిడ్ యూజర్లు ఇప్పుడు తలలు పట్టుకుంటున్నారు. ఎందుకంటే అందులో ఉండే స్పైహైడ్ అనే ప్రమాదకరమైన సాఫ్ట్వేర్ మన వ్యక్తిగత సమాచారాన్ని మొత్తం అంగట్లో అమ్మకానికి పెడుతోంది. ఈ యాప్ ద్వారా దాదాపు 60 వేల ఆండ్రాయిడ్ ఫోన్లల్లోకి వైరస్ చొరబడిందని.. అది మన ప్రైవేటు డేటాను రహస్యంగా యాక్సెస్ చేసి మార్కెట్లో విక్రయాలకు పాల్పడుతోందని అమెరికాకు చెందిన ఓ ప్రముఖ వెబ్సైట్ రిపోర్ట్ నివేదించింది. చాలా ప్రమాదకరమైన సాఫ్ట్వేర్గా పేర్కొనే స్పైహైడ్ సాఫ్ట్వేర్ 2016 నుంచి ఇప్పటి వరకు వేలాది ఆండ్రాయిడ్ యూజర్ల డివైజుల్లోకి చొరబడి డేటాను యాక్సెస్ చేసినట్లు వెల్లడించింది. ఈ డేటాలో మన కాల్ లాగ్స్, కాంటాక్ట్స్, ఫొటో గ్యాలరీ, మెసేజ్లు, రికార్డింగులు, రియల్ టైమ్ లొకేషన్తో పాటు ఇతర విలువైన సమాచారాన్ని కూడా అపహరించినట్లు స్పష్టం చేసింది.
లక్షల మంది వివరాలు..
Spyhide Software : ఇటీవలే స్విట్జర్లాండ్కు చెందిన Maia Arson Crimew హ్యాకర్ కూడా స్పైహైడ్ సాఫ్ట్వేర్ ద్వారా వేల మంది వినియోగదారుల వ్యక్తిగత సమాచారం బహిర్గతమైందని గుర్తించింది. అంతే కాకుండా ఈ స్పైహైడ్ ప్రపంచవ్యాప్తంగా యాక్టివ్గా పనిచేస్తుందని టెక్ క్రంచ్ నివేదిక తెలిపింది. అమెరికాలో 3,100 ఆండ్రాయిడ్ మొబైల్స్లోని లక్ష కంటే ఎక్కువ లొకేషన్ డేటా పాయింట్లను సేకరించిందని చెప్పింది. మొత్తం 7,50,000 మంది సైన్ అప్ వినియోగదారుల వివరాలను అపహరించినట్లుగా ఆధారాలు సేకరించింది. ఇందులో 3.29 మిలియన్ల మెసేజ్లు, పాస్‌వర్డ్ రీసెట్ లింక్‌లు, 1.2 మిలియన్ కాల్ లాగ్‌లు, 3,12,000 కాల్ రికార్డింగ్ ఫైల్‌లు, 9,25,000కి పైగా కాంటాక్ట్ లిస్ట్‌లు, 3,82,000 ఫొటోలు ఉన్నాయి.
ఇది కాస్త డిఫరెంట్..
Stalkerware App : మన ఫోన్లోని డేటాను దొంగిలించేందుకు సైబర్ నేరగాళ్లు పంపే సాధారణ యాప్ లింక్స్ కంటే ఇది అత్యంత ప్రమాదకరమని.. ఇది మన ఫోన్లో ఉండే సున్నితమైన సమాచారాన్ని మనకి తెలియకుండానే అపహరిస్తుందని టెక్ నిపుణులు అంటున్నారు. ఈ స్పైహైడ్ సాఫ్ట్వేర్ మన ప్రైవేటు డేటాను యాక్సెస్ చేసి దాన్ని సైబర్ కేటుగాళ్లకు అందిస్తుంది. ఇలా సేకరించిన డేటాను ఇతర సైబర్ నేరగాళ్లకు సరఫరా చేస్తూ బాధితులు పెద్ద మొత్తంలో నష్టపోయేలా మోసాలకు పాల్పడుతోందని ఓ రిపోర్ట్ స్పష్టం చేసింది. అయితే ప్రస్తుతం ఈ సాఫ్ట్వేర్ లేదా యాప్ను ఇప్పటికే ఉన్న ఆండ్రాయిడ్ పరికరాల నుంచి తొలగించడమే పెద్ద సవాలుగా మారింది.
How To Detect Stalkerware On Android Phone : ఈ సాఫ్ట్వేర్ ప్రపంచవ్యాప్తంగా యాక్టివ్గా పనిచేస్తోందని నివేదికలు స్పష్టం చేసిన నేపథ్యంలో.. భారత్లోనూ ఆండ్రాయిడ్ యూజర్స్ కాస్త భయాందోళనలకు గురవుతున్నారు. అయితే మీరు దీని బారిన పడలేదని నిర్ధరించుకోవడం చాలా ముఖ్యం. కాగా, ఒకవేళ మీరూ బాధితులైతే ఈ కింద తెలిపిన స్టెప్స్ ఫాలో అవుతూ దాని బారి నుంచి ఎలా బయట పడాలో ఇప్పుడు చూద్దాం.
గుర్తిస్తే.. తీసేయండిలా..
How To Delete Spy App On Android : ఈ రకమైన యాప్‌లు తరచుగా మీ ఫోన్లో సాధారణ యాప్స్ లాగే కనిపిస్తుంటాయి. కానీ, అవి మన డేటాను అపహరించేవి అని గుర్తించడం అంత సులువైన విషయం కాదు. ఉదాహరణకు డివైజ్లో స్పైహైడ్ ఉన్నా సరే దానిని గుర్తించడం చాలా కష్టం. ఎందుకంటే గూగుల్ సెట్టింగ్స్లో గూగుల్ థీమ్డ్ యాప్స్ వలె అది కనిపిస్తుంది. లేదా రింగ్టోన్ యాప్లా ఉండే టీ రింగ్టోన్లా ఉంటుంది. వాస్తవానికి దీనిని మనం గూగుల్ అందించే యాప్స్ అనే అనుకుంటాము. కానీ కొన్ని సార్లు అటువంటి ఐకాన్లతో పోలి ఉన్న ఫేక్ యాప్స్ కూడా మన మొబైల్లో ఇన్స్టాల్ అయి ఉంటాయి. అప్పుడు మీరు సెట్టింగ్స్లోకి వెళ్లి మీరు ఇన్స్టాల్ చేసుకున్న యాప్స్ను మాత్రమే ఉంచుకొని అనుమానంగా కనిపించిన యాప్స్ను డిలీట్ లేదా అన్ఇన్స్టాల్ చేసేయండి.
పాస్వర్డ్స్కు బదులు ఫింగర్ప్రింట్స్..
స్పైహైడ్, స్టాక్వేర్ వంటి ప్రమాదకరమైన యాప్స్, సాఫ్ట్వేర్ల బారిన పడకుండా ఉండేందుకు.. ఆండ్రాయిడ్ అందించే బెస్ట్ యాంటీవైరస్ యాప్లను స్కానింగ్ కోసం వినియోగించండి. అలాగే మీ ఫోన్ లాక్లను తెరిచేందుకు పాస్వర్డ్స్, పిన్ల కంటే.. ఫింగర్ప్రింట్స్, ఫేస్ రికగ్నిషన్ వంటి బయోమెట్రిక్స్ను ఉపయోగించడం ద్వారా ఈ మాల్వేర్ బారి నుంచి సులభంగా బయటపడతారు. అయితే ఈ మాల్వేర్ పట్ల కేవలం ఆండ్రాయిడ్ యూజర్స్ మాత్రమే కాకుండా ఐఓఎస్ వినియోగదారులు కూడా అప్రమత్తంగా ఉండాలని సూచిస్తున్నారు టెక్ నిపుణులు.
