రెండోసారి ప్రధానిగా పీఠమెక్కిన రెండేళ్ల తరవాత మొదటిసారి మంత్రివర్గాన్ని పునర్‌ వ్యవస్థీకరించిన మోదీ- సరికొత్త ప్రమాణాలతో కొత్త బృందం కూర్పును పూర్తిచేశారు. వెనకబడిన వర్గాలకు, కొత్తనీటికి విశేష ప్రాధాన్యమిస్తూనే మహిళాశక్తికి సముచిత స్థానం కల్పించి రాష్ట్ర రాజకీయాల్లో భిన్న రంగాల్లో రాటుతేలిన అనుభవజ్ఞులను కేంద్ర కేబినెట్‌లోకి ఆహ్వానించారు. 'కనిష్ఠ ప్రభుత్వం- గరిష్ఠ పాలన' విధానంపై గతంలో మక్కువ చాటిన ప్రధాని ఈ దఫా 77 మంది మంత్రులతో భారీ మంత్రిమండలిని కొలువుతీర్చారు! రాబోయే అయిదు రాష్ట్రాల ఎన్నికల్లో గెలుపే లక్ష్యంగా ఆచితూచి నూతన దళపతులను ఎంచుకోవడం సహా ఇన్నేళ్లుగా ప్రభుత్వానికి ఆవల ఉండిపోయిన ఎన్డీయే పక్షాలకూ ఎర్రతివాచీ పరిచారు.
బలోపేతం దిశగా..
దశాబ్దాల చరిత్రకు మౌనసాక్షి అయిన రాష్ట్రపతి భవన్‌లోని దర్బార్‌ హాల్‌లో నిన్న ప్రమాణస్వీకారం చేసిన 43 మంది మంత్రుల్లో ఏడుగురికి పదోన్నతి లభించగా, ముప్ఫై ఆరుగురు కొత్తవారు. మెరుగైన పనితీరుతో ప్రధాని మెప్పు పొందిన సప్త సహాయ సచివుల్లో జి.కిషన్‌రెడ్డి ఒకరు కావడం తెలుగువారికి తీపివార్తే అయినా- బంతి భోజనంలో ఆంధ్రప్రదేశ్‌కు ఈసారీ ఖాళీ విస్తరే దక్కింది! కీలక రాష్ట్రమైన ఉత్తర్‌ ప్రదేశ్‌లో అధికారం చెయ్యిదాటిపోకుండా భాజపా అధిష్ఠానం చేసిన కసరత్తు మంత్రివర్గ కూర్పులో ప్రస్ఫుటమైంది. బంగాల్ ముఖ్యమంత్రి మమతను నిలువరించి అక్కడ పార్టీని పైమెట్టుకు చేర్చే బాధ్యతను ముగ్గురు కొత్త సచివులకు అప్పగించింది. ఇవ్వజూపిన పదవులపై కినుక వహించి క్రితం సారి మంత్రివర్గానికి దూరంగా ఉండిపోయిన నితీశ్‌ జేడీయూ- ఈ తడవ రెండు పదవులతో సర్దుకుంది. గుజరాత్‌, కర్ణాటకల్లో భాజపా పునాదులను బలోపేతం చేసుకోవడం సహా ఈశాన్య, హిమాలయ రాష్ట్రాల్లో కాషాయధ్వజాన్ని రెపరెపలాడించాలనుకుంటున్న మోదీ-షా ద్వయం ఆలోచనలకు మంత్రిమండలి అద్దంపడుతోంది.
పునర్‌ వ్యవస్థీకరణ దరిమిలా 25 రాష్ట్రాలు, కేంద్ర పాలిత ప్రాంతాలకు క్యాబినెట్‌లో ప్రాతినిధ్యం లభించింది. విజయ శిఖరాల అధిరోహణకు బృందస్ఫూర్తే తారకమంత్రమని తరచూ చాటే ప్రధాని- కొత్త బృందం సమష్టి భాగస్వామ్యంతో దేశాన్ని ప్రగతిపథంలో నడిపించాలన్నదే జాతిజనుల ఆకాంక్ష!
భిన్న స్వరాలు..
కొత్త మంత్రులకు అవకాశమిస్తూ రాజీనామాలతో పక్కకు తప్పుకొన్న పన్నెండు మందిలో హర్షవర్ధన్‌, రవిశంకర్‌ ప్రసాద్‌, ప్రకాశ్‌ జావడేకర్‌, సదానంద గౌడ వంటి సీనియర్లు ఉండటం ఎందరినో విస్మయపరచింది. కరోనా విజృంభణను అరికట్టడంలో వైఫల్యానికి ఆరోగ్యమంత్రి హర్షవర్ధన్‌ అనివార్యంగా మూల్యం చెల్లించాల్సి వచ్చింది. 'ఆయనను బలిపశువు చేశారు' అన్న మమతా బెనర్జీ వ్యాఖ్యల అంతరార్థమదే! శివసైనికుడిగా రాజకీయ ప్రస్థానాన్ని ప్రారంభించి కాంగ్రెస్‌ తీర్థం పుచ్చుకొని భాజపా గూటికి వచ్చి చేరిన మరాఠా నేత నారాయణ్‌ రాణే, వివాదాలతో సదా సహవాసం చేసే కన్నడ సివంగి శోభ కరాంద్లాజే ప్రభృతుల ఎంపికపై భిన్న గళాలు వినవస్తున్నాయి. మధ్యప్రదేశ్‌లో భాజపా అధికారాన్ని చేజిక్కించుకోవడంలో అక్కరకొచ్చిన జ్యోతిరాదిత్య సింధియాకు మంత్రి పదవి రూపేణా కేబినెట్‌లో స్థానం ఊహించినదే! ఉత్తర్‌ ప్రదేశ్‌, బిహార్‌లోని కీలక సామాజిక వర్గాల ప్రతినిధులైన 'అప్నాదళ్‌' అనుప్రియ పటేల్‌, లోక్‌జనశక్తి నేత పశుపతి కుమార్‌ పారస్‌లకు మంత్రివర్గంలో చోటు ముందుగానే ఖరారైంది.
నిపుణులకు పెద్దపీట..
కుల సమీకరణలతో సహా లెక్కలన్నింటినీ పక్కాగా పాటిస్తూనే విభిన్న రంగాల్లో నిపుణులైన వారికి పెద్దపీట వేయడం- మోదీ కొత్త జట్టుకు ప్రత్యేకతగా భాసిస్తోంది. రెండేళ్ల క్రితం పదిహేడో సార్వత్రిక ఎన్నికల సమరాన పట్టణ ప్రాంతాల కన్నా మిన్నగా గ్రామీణ భారతమే తమను ఆదరించి అద్భుత గెలుపును కట్టబెట్టిందని అప్పట్లో ప్రధాని మోదీ విశ్లేషించారు. కరోనా మహమ్మారి బారినపడి కునారిల్లుతున్న యావద్భారతాన్నీ మెప్పించే కార్యాచరణ ప్రణాళికే మున్ముందు దీటైన విజయాన్ని సమకూర్చే కీలకాంశం. ఆ మేరకు ఉద్యోగిత ఇనుమడించేలా, కీలక రంగాలను తేజరిల్లజేసే ప్రణాళికల అమలుకు సరికొత్త మంత్రిమండలి నిబద్ధమైతేనే- ప్రస్తుత కసరత్తుకు తగిన ప్రతిఫలం దక్కుతుంది!
ఇదీ చూడండి: కేబినెట్ నుంచి కీలక నేతలు ఔట్- ఎందుకిలా?
