దేశ ఆరోగ్య రంగంలో సరికొత్త విప్లవంగా అభివర్ణిస్తూ నేషనల్ డిజిటల్ హెల్త్ మిషన్ (ఎన్డీహెచ్ఎం)కు మోదీ ప్రభుత్వం జెండా పండగనాడు శ్రీకారం చుట్టింది. సరైన వైద్యుల ఎంపిక, డాక్టర్ల అపాయింట్మెంట్ కోరడం, రుసుముల చెల్లింపు, పదే పదే పాత రికార్డుల్ని చంకన పెట్టుకొని వెళ్ళడం వంటి బాదరబందీలనుంచి ఎన్డీహెచ్ఎం రోగులకు స్వేచ్ఛ ప్రసాదిస్తుందని ఆరోగ్య మంత్రిత్వశాఖ చెబుతున్నా- సక్రమంగా పట్టాలకెక్కితే ఈ ఆరోగ్య గుర్తింపు కార్డు పథకం మరెంతో ప్రభావాన్వితమైనది. 2017నాటి జాతీయ ఆరోగ్య విధానం- సాంకేతిక పరిజ్ఞానమే వెన్నుదన్నుగా ఆరోగ్యరంగ వ్యవస్థను సాంతం డిజిటలీకరించాలని ప్రతిపాదించింది. ఆయుష్మాన్ భారత్ను కేంద్రం ప్రారంభించినందున రేపటి అవసరాలకు దీటైన డిజిటల్ ఆరోగ్య వ్యవస్థ అవసరం మరింతగా పెరిగిందంటూ నీతి ఆయోగ్ 2018లో ‘నేషనల్ హెల్త్ స్టాక్’ పేరిట దార్శనిక పత్రం వెలువరించింది దాని వెన్నంటి నిరుడు జులైలో విశిష్ట గుర్తింపు ప్రాధికార సంస్థ ఛైర్మన్ సారథ్యంలోని కమిటీ ఖరారు చేసిన విధివిధానాల మేరకే ఎన్డీహెచ్ఎం ఏర్పాటైంది.
డిజిటలీకరించడం...
వ్యక్తుల సంపూర్ణ ఆరోగ్య సమాచారాన్ని డిజిటలీకరించడం, ఎక్కడైనా ఎప్పుడైనా రోగి సమ్మతితో వైద్యులకు అది అందుబాటులోకి వచ్చేలా చూడటం, మందుల షాపులు, లేబొరేటరీలు, రేడియాలజీ క్లినిక్లు, ఆసుపత్రులు, బీమా సంస్థల వంటి క్రియాశీల విభాగాలన్నింటికీ చోటుపెట్టి వ్యక్తిగత ఆరోగ్య కార్డు పరిపుష్టమయ్యేలా నెట్వర్క్ను పునాది స్థాయినుంచి పటిష్ఠంగా నిర్మించడం- అదో బృహత్ యత్నం. ఆధార్ కార్డు మాదిరిగానే దీన్నీ విజయవంతం చెయ్యాలనుకొన్నా- ఎక్కడికక్కడ సమాచారాన్ని అప్లోడ్ చేసే ఆపరేటర్లకు బాధ్యతాయుత శిక్షణ మొదలు, వ్యక్తిగత గోప్యత పరిరక్షణ దాకా భిన్నస్థాయుల్లో అధిగమించాల్సిన ప్రతిబంధకాలు అనేకం. నేడు కేంద్రపాలిత ప్రాంతాలతో మొదలై 2022నాటికి దేశవ్యాప్తం చెయ్యాలనుకొంటున్న హెల్త్ కార్డుల పథకం జనశ్రేయస్సాధకం కావాలంటే- మౌలిక సేవల మెరుగుదలపైనా ప్రభుత్వం దృష్టి సారించాలి!
ఎక్కడవేసిన గొంగడి అక్కడే
ఏటికేడు నూతనావిష్కరణలతో వైద్యరంగం అద్భుతంగా పురోగమిస్తుంటే, సాంకేతిక పరిజ్ఞానం దన్నుతో ఆరోగ్య సేవల్ని రోగులకు సానుకూలంగా మార్చడంలో అగ్రదేశాలు అగణిత అభివృద్ధి సాధించాయి. రోగుల మెడికల్ రికార్డుల డిజిటలీకరణపై అమెరికా దాదాపు మూడు లక్షల కోట్ల రూపాయల వ్యయం చేసింది. దేశీయంగా ఆసుపత్రులన్నీ ఎలక్ట్రానిక్ మెడికల్ రికార్డులవైపు మళ్లాలని 2013లో తొలిసారి ప్రామాణికాలను నిర్దేశించి, 2016లో వాటిని నవీకరించినా- ఎక్కడవేసిన గొంగడి అక్కడే ఉంది. డాక్టరు లేదా ఆసుపత్రి మారినప్పుడల్లా మొదటినుంచీ అన్ని ఆరోగ్య పరీక్షలూ మళ్ళీ చేయించుకోక తప్పని దుర్గతి కోట్లాది కుటుంబాల్ని ఆర్థికంగా చిదిమేస్తోంది. పురిటి కందునుంచి బిడ్డ ఎదిగే క్రమంలో ప్రతి దశలోనూ అతని ఆరోగ్యం తీరుతెన్నులు రుగ్మతలు, వాడిన మందులు వంటి సంపూర్ణ సమాచారమంతా హెల్త్కార్డులో నిక్షిప్తం చేయాలన్న ప్రణాళిక ఎంతో విప్లవాత్మకమైనదనడంలో మరోమాట లేదు.
1.3 శాతం..
సరైన వైద్య సేవలు అందుబాటులో లేక నివారించదగిన రోగాల పాలబడి ఏటా లక్షల సంఖ్యలో అభాగ్యులు నిస్సహాయంగా కనుమూస్తున్న దేశం మనది. స్థూల దేశీయోత్పత్తిలో 1.3శాతం దాటని ప్రభుత్వ ఆరోగ్య వ్యయం, ప్రైవేటు వైద్య సేవలన్నీ పట్టణాలకే పరిమితమైన వైనం- స్వస్థ సేవల్ని మెజారిటీ జనావళికి మరీచికగా మార్చేశాయి. దేశవ్యాప్తంగా 20శాతానికిపైగా ప్రాథమిక, 30శాతానికిపైగా సామాజిక ఆరోగ్య కేంద్రాల లోటు వెక్కిరిస్తోంది. వైద్యులు, నర్సులతోపాటు మౌలిక ఆరోగ్య సదుపాయాలకూ కొరత దశాబ్దాలుగా వెంటాడుతోంది. దేశవ్యాప్తంగా లక్షన్నర స్వస్థ కేంద్రాల ఏర్పాటుకు సమకట్టిన మోదీ ప్రభుత్వం- ఆరోగ్య కార్డులు అందించగల స్థాయిలో వాటిని తీర్చిదిద్దాలి. నిధుల్లేక నీరసించిన ఆరోగ్య రంగానికి జవసత్వాలందిస్తూ హెల్త్కార్డుల విప్లవాన్ని విజయవంతం చెయ్యాలి!