కరోనా లాక్‌డౌన్‌ కారణంగా ఇంట్లో కాలక్షేపం కోసం ఎక్కువశాతం మంది సోషల్‌ మీడియా వేదికలపై ఆధారపడుతున్నారు. వీటిలో టిక్‌టాక్‌ కూడా ఒకటి. అయితే తమ పిల్లలు అనునిత్యం టిక్‌టాక్‌ అంటూ ఎక్కువ సమయాన్ని వృథా చేస్తున్నారని, ఇది ఇలాగే కొనసాగితే అది వారి శారీరక, మానసిక ఆరోగ్యంపై ప్రతికూల ప్రభావం పడుతుందేమోనని చాలామంది తల్లిదండ్రులు ఆందోళన చెందుతున్నారు.
ఇదే విషయాన్ని వాళ్లకు అర్థమయ్యేలా చెప్పినా.. తల్లిదండ్రుల మాట విని తమ అలవాట్లను మార్చుకునే పిల్లలు ఈరోజుల్లో ఎంతమంది ఉన్నారు..? ఒకవేళ బతిమాలో, భయపెట్టో.. వారి చేత టిక్‌టాక్‌ వాడకాన్ని తగ్గించేలా చేసినా.. తల్లిదండ్రులకు తెలియకుండా ఈ యాప్‌ను వాడడం ఈ కాలం పిల్లలకు పెద్ద పనేం కాదు. ఈ క్రమంలో టిక్‌టాక్‌ సంస్థ తమ యాప్‌లో కొత్తగా ‘Family Pairing’ అనే ఫీచర్‌ని తీసుకొచ్చింది. దీని ద్వారా తల్లిదండ్రులు తమ పిల్లల టిక్‌టాక్‌ ఖాతాలను కొంతవరకు కంట్రోల్‌ చేయొచ్చు. అది ఎలాగో తెలుసుకుందాం..!
ఇలా చేయండి..!
మీ పిల్లల టిక్‌టాక్‌ అకౌంట్‌ని కంట్రోల్‌ చేసేందుకు ముందుగా మీకంటూ ప్రత్యేకంగా టిక్‌టాక్‌లో ఒక అకౌంట్‌ ఉండాలి. మీరు వాడుతోన్న యాప్‌ లేటెస్ట్‌ వెర్షన్‌ అయితే ఫర్వాలేదు.. ఒకవేళ కాకపోయుంటే మాత్రం ప్లేస్టోర్‌కి వెళ్లి దానిని అప్‌డేట్‌ చేయండి. ఇప్పుడు టిక్‌టాక్‌ యాప్‌ ఓపెన్‌ చేసి..
- ప్రొఫైల్‌ పేజీని క్లిక్‌ చేయండి
- కుడివైపు పైన కనిపించే మూడు చుక్కలపై క్లిక్‌ చేయండి
- ఇప్పుడు General విభాగంలో ‘Digital Wellbeing’ పై క్లిక్‌ చేయండి
- ఆ తర్వాత ‘Family Pairing’ ఆప్షన్‌ను ఎంచుకోండి.
- ఇప్పుడు మీకు ‘Who is using this TikTok account?’ (ఈ అకౌంట్‌ను ఎవరు ఉపయోగిస్తున్నారు..?) అనే సందేశం కనిపిస్తుంది. దాని కింద ‘Parent’, ‘Teen’ అని రెండు ఆప్షన్లు కనిపిస్తాయి. వీటిలో ‘Parent’ ను ఎంపిక చేసుకొని ‘Continue’ పై క్లిక్‌ చేయగానే మీ ఫోన్‌ స్క్రీన్‌పై ఓ QR కోడ్‌ కనిపిస్తుంది.
- ఇప్పుడు మీరు మీ పిల్లల ఫోన్‌ తీసుకొని పైన చెప్పిన విధంగా 1 నుంచి 5 స్టెప్స్‌ వరకు అనుసరించండి. ‘Who is using this TikTok account?’ దగ్గర మాత్రం ‘Teen’ను ఎంపిక చేసుకోండి.
- అలా చేయగానే మీకు ‘Scan Code’ అనే ఆప్షన్‌ కనిపిస్తుంది. దానిని క్లిక్‌ చేసి మీ మొబైల్‌లో వచ్చిన QR కోడ్‌ను పిల్లల ఫోన్‌తో స్కాన్‌ చేయండి. అప్పుడు ‘మీ అకౌంట్‌ ఫలానా అకౌంట్‌తో లింక్‌ అవ్వనుంది’ అని ‘Teen’ అకౌంట్‌కి సందేశం వెళ్తుంది. అక్కడ కనిపించే ‘Link Accounts’ అనే ఆప్షన్‌పై క్లిక్‌ చేస్తే.. మీ పిల్లల టిక్‌టాక్‌ అకౌంట్‌ మీ అకౌంట్‌తో పెయిర్‌ అయినట్లే..!
- ఈ కొత్త ఫీచర్ ద్వారా 13 ఏళ్లు, అంతకంటే ఎక్కువ వయసున్న టిక్‌టాకర్ల అకౌంట్లను పర్యవేక్షించచ్చు.
పెయిరింగ్‌ వల్ల లాభాలేంటి..?
- మీ కుటుంబ సభ్యుడు/సభ్యురాలు టిక్‌టాక్‌ చూసే సమయానికి (వాచ్‌ టైమ్‌) పరిమితులు పెట్టొచ్చు.
- మీ కుటుంబ సభ్యుడు/సభ్యురాలు చూసేందుకు తగని కంటెంట్‌ను వాళ్లు చూడకుండా మీరు నియంత్రించొచ్చు.
- మీ కుటుంబ సభ్యుడు/సభ్యురాలికి ఎవరు సందేశాలు పంపాలి..? అనే దానిపై పరిమితులు పెట్టొచ్చు.
ఈ కొత్త ఫీచర్ కేవలం తల్లిదండ్రులు తమ పిల్లల అకౌంట్లను పర్యవేక్షించడం కోసం మాత్రమే కాదు.. భార్య తన భర్త అకౌంట్‌ను; అన్న తన చెల్లి అకౌంట్‌ను; అక్క తన తమ్ముడి అకౌంట్‌ను.. ఇలా అవతలి వ్యక్తి అనుమతితో ఎవరు ఎవరి అకౌంట్‌నైనా పర్యవేక్షించొచ్చు. ఈ క్రమంలో పర్యవేక్షించాలనుకునే వాళ్లు ‘Parent’ అవుతారు.. అవతలి వ్యక్తి ‘Teen’ అవుతారు.
ఒకసారి రెండు అకౌంట్ల మధ్య ‘Family Pairing’ జరిగిన తర్వాత మళ్లీ దానిని వెనక్కి తీసుకోవాలంటే ‘Teen’ అకౌంట్‌ నుంచి ‘Unlink’ అనే ఆప్షన్‌ను ఉపయోగించుకోవచ్చు. కాకపోతే, దానికి ‘Parent’ వ్యక్తి అనుమతి కూడా కావాలి.
ఈ కొత్త ఫీచర్ ద్వారా టిక్‌టాక్‌ మరో రెండు కొత్త మార్పులకు నాంది పలికింది.
- 16 ఏళ్ల కంటే తక్కువ వయసున్న టిక్‌టాకర్లకు DM (Direct Message) పంపే సదుపాయాన్ని తీసేసింది.
- DM (Direct Message) ద్వారా కేవలం సందేశాలు తప్ప ఫొటోలు, వీడియోలు పంపే సౌకర్యాన్ని తీసేసింది.
టిక్‌టాక్‌ అందిస్తోన్న ఈ కొత్త ఫీచర్ సేవలు ఏప్రిల్‌ 30 నుంచి అందుబాటులోకి రానున్నట్లు ఆ సంస్థ తెలిపింది.
మీ పిల్లలు భద్రం..!
టిక్‌టాక్‌ వాడుతోన్న పిల్లల తల్లిదండ్రులకు ఈ సంస్థ కొన్ని జాగ్రత్తలు కూడా సూచిస్తోంది. అవేంటంటే..
- టిక్‌టాక్‌ యాప్‌ 13 ఏళ్లు అంతకంటే ఎక్కువ వయసున్న వారి కోసమే..! అందుకే దీని యాప్‌ స్టోర్‌ రేటింగ్‌ కూడా ‘12+’ అని ఇచ్చాం. తద్వారా గూగుల్‌ లేదా యాపిల్‌ సంస్థలు అందించే ‘Device based parental controls’ ద్వారా 13 ఏళ్ల కంటే తక్కువ వయసున్న వాళ్లు ఈ యాప్‌ని ఉపయోగించకుండా బ్లాక్‌ చేయొచ్చు.
- టిక్‌టాక్‌ ఇన్‌స్టాల్‌ చేసిన వెంటనే ఆ అకౌంట్‌ ‘Public’లో ఉంటుంది. దానిని ‘Private’లో పెట్టండి. దీని ద్వారా మీ ఫాలోవర్లు మాత్రమే కంటెంట్‌ను చూడగలుగుతారు.
- మీ పిల్లల ఫాలోవర్లలో మీకు నచ్చని వారిని ‘Remove’ / ‘Block’ చేయొచ్చు. ‘Remove’ చేయడం ద్వారా అవతలి వ్యక్తి మీ పిల్లలకు సందేశం పంపే అవకాశముంటుంది. ‘Block’ చేయడం ద్వారా ఆ అవకాశం కూడా ఉండదు.
- టిక్‌టాక్‌లో మీ పిల్లలు చూసే వీడియో కంటెంట్‌.. వాళ్లు చూడడానికి తగదని మీకు అనిపిస్తే.. ఆ వీడియోపై లాంగ్‌ ప్రెస్‌ చేసి ‘Not Interested’ అనే ఆప్షన్‌పై క్లిక్‌ చేయండి. తద్వారా భవిష్యత్తులో అలాంటి వీడియోలు వారికి కనిపించవు.
- మీ పిల్లల అకౌంట్‌ ‘Public’ లేదా ‘Private’లో ఉన్నా తమ వీడియోల కింద ఎవరూ కామెంట్స్‌ పెట్టకుండా ఉండేందుకు సెట్టింగ్స్‌లోకెళ్లి కామెంట్స్‌ సెక్షన్‌ను తీసేయచ్చు. ఒకవేళ తాము పోస్ట్‌ చేసే కొన్ని వీడియోలకు మాత్రమే అవతలి వారు కామెంట్స్‌ పెట్టడం ఇష్టం లేనప్పుడు.. ఆ వీడియో పోస్ట్‌ చేసే క్రమంలో కామెంట్స్‌ సెక్షన్‌ను తీసేయొచ్చు.
- మీ పిల్లలు ‘Unfollow’ ‘Block’ ఆప్షన్ల ద్వారా ఇతరుల నుంచి వచ్చే సందేశాలను రాకుండా చేయొచ్చు. లేదంటే అకౌంట్‌ సెట్టింగ్స్‌ ద్వారా తమకు ఎవరూ సందేశాలు పంపకుండా చేసుకోవచ్చు.
- మీ పిల్లలు పోస్ట్‌ చేసిన వీడియోలతో డ్యూయెట్‌ వీడియోలు ఎవరు చేయొచ్చో ముందే నిర్ణయించవచ్చు.
- టిక్‌టాక్‌లో ఏదైనా వీడియో ఈ సంస్థ నియమ, నిబంధనలకు విరుద్ధంగా ఉన్నట్లు మీకు అనిపిస్తే వెంటనే దానిని ‘Report’ చేయండి.
- Digital Wellbeing ఆప్షన్‌ ద్వారా మీ పిల్లల స్క్రీన్‌ టైమ్‌ని తగ్గించండి.
- మీ పిల్లలతో కలిసి మీరూ సరదాగా టిక్‌టాక్‌లు చేయండి. ఇవి ఇద్దరికీ మధుర జ్ఞాపకాలుగా మిగిలిపోతాయి.
పైన చెప్పిన జాగ్రత్తలు పాటిస్తూ సోషల్‌ మీడియా ద్వారా ఎదురయ్యే సమస్యల నుంచి మీ పిల్లలను కాపాడుకోండి.
