పూర్వీకుల నుంచి తరతరాలుగా పాటిస్తూ వస్తోన్న సహజసిద్ధమైన సౌందర్య ఉత్పత్తులే కారణమంటున్నారు ‘స్పెయిన్‌ అతివలు’. బామ్మల సౌందర్య చిట్కాలను క్రమం తప్పకుండా అనుసరిస్తూ తమ అందానికి మెరుగులు దిద్దుతున్నారు.
‘ఆలివ్‌ నూనె’తో అందంగా..!
ఆలివ్‌ నూనె.. ఆరోగ్యానికి, అందానికి ఇది చేసే మేలు గురించి ఎన్నిసార్లు చెప్పినా, ఎంత చెప్పినా తక్కువనే చెప్పాలి. ప్రకృతి ప్రసాదించిన ఈ తైలం.. చర్మ సమస్యలతో పాటు జుట్టు సమస్యలకూ చెక్‌ పెడుతుంది. అందుకే ఆలివ్‌ నూనెను తమ బ్యూటీ రొటీన్‌లో భాగం చేసుకుంటున్నారు స్పెయిన్‌ భామలు. స్నానమాచరించడానికి గంట లేదా రెండు గంటల ముందు శరీరమంతా ఈ నూనెను అప్లై చేసుకుని నెమ్మదిగా మర్దన చేసుకుంటారు. ఫలితంగా చర్మానికి లోలోపలి నుండి పోషణ అంది.. మేను తేమను కోల్పోకుండా చేస్తుందీ నూనె. అలాగే ఎలాంటి ఫేస్‌మాస్క్‌ వేసుకోవాలన్నా.. గోరు వెచ్చని ఆలివ్‌ నూనెను ముఖానికి రాసుకుని ఆపై మాస్క్‌ని పూతలా రాసుకుంటారు స్పెయిన్‌ అతివలు. దీనివల్ల చర్మకణాలకు డ్యామేజ్‌ జరగకుండా కాపాడుకోవచ్చంటున్నారీ ముద్దుగుమ్మలు. ఇక తమ కురులకు కుదుళ్ల నుండి పోషణను అందించడంలో ముఖ్య పాత్ర ఆలివ్‌ నూనెదేనట. ఇందుకోసం జుట్టు కుదుళ్ల నుంచి చివర్ల వరకు ఈ నూనెను పట్టించి.. ఆపై రెండు గంటల తర్వాత గాఢత తక్కువగా ఉండే షాంపూతో తలస్నానం చేస్తారు. అంతేకాదు.. తాము తినే ఆహారంలో కూడా ఆలివ్‌ నూనెను భాగం చేసుకోవడం వల్ల సంపూర్ణ ఆరోగ్యం, అందం తమ సొంతమవుతుందంటున్నారు స్పెయిన్‌ భామలు.
‘ఉప్పు’తో స్క్రబ్‌..
పెరిగిపోతున్న కాలుష్యం, దుమ్ము శరీరంపై పేరుకుపోయి ఎన్నో చర్మ సమస్యలకు కారణమవుతున్నాయి. వీటి వల్ల అలర్జీ, మొటిమలు, మచ్చలు, ముడతలు, చర్మం తేమను కోల్పోయి పొడిబారడం.. ఇలా చెప్పుకుంటూ పోతే చర్మ సమస్యలకు సంబంధించి పెద్ద లిస్టే తయారుచేయచ్చు. మరి, ఈ సమస్యలన్నింటి నుంచి విముక్తి పొందాలంటే.. చర్మంపై పేరుకుపోయిన మురికిని స్క్రబ్‌ ద్వారా శుభ్రం చేస్తే సరి. ఆ ప్రక్రియ కోసం ఉప్పును వాడుతూ తమ శరీరాన్ని మృదువుగా మార్చుకుంటున్నారు స్పెయిన్‌ అందాలు. స్నానమాచరించడానికి ముందు లేదా తీరిక సమయాల్లో ఉప్పుకి కాస్త తేనె, ఆలివ్‌ లేదా కొబ్బరి నూనె, ఏదైనా ఎసెన్షియల్‌ నూనెలను కలిపి స్క్రబ్‌లా తయారుచేసుకోవాలి. దీన్ని శరీరానికి మాస్క్‌లా పట్టించి.. ఆపై మృదువుగా రుద్దాలి. ఈ ప్రక్రియ వల్ల ఉప్పు చర్మంపై పేరుకున్న మురికిని వదలగొడుతుంది. తేనె, నూనెలు చర్మానికి మాయిశ్చరైజర్‌గా పనిచేస్తాయి. ఇక ఎసెన్షియల్‌ నూనె వల్ల చర్మం పరిమళభరితంగా మారుతుంది. ఇలా స్పెయిన్‌ మహిళలు తమ చర్మాన్ని శుభ్రపరచుకోవడంతో పాటు.. అదే సమయంలో మేనికి పోషణను కూడా అందిస్తున్నారు.
‘బంగాళాదుంప’తో కంటికి స్వాంతన!
ప్రతి ఒక్కరి ఇంట్లో వారంలో కనీసం ఒక్కసారైనా బంగాళాదుంప కూర వండాల్సిందే..! చిన్న, పెద్ద అనే లేకుండా అందరూ ఇష్టంగా తినే కూర ఇదే అనడంలో అస్సలు సందేహం లేదు. ఇలా రుచిలోనే కాదు అందానికి మెరుగులద్దడంలో కూడా ఈ దుంప కింగ్‌ అని చెప్పచ్చు. అందుకే స్పెయిన్‌ మగువలు కూడా తమ అందానికి అదనపు హంగులద్దడానికి బంగాళాదుంపను తమ బ్యూటీ రొటీన్‌లో చేర్చుకుంటున్నారు. విశ్రాంతి లేకపోవడం, నిద్రలేమి.. వంటి పలు కారణాల వల్ల కళ్లు అలసిపోవడం సహజం. ఈ సమస్యను పోగొట్టి కంటిని తిరిగి పునరుత్తేజితం చేయాలంటే బంగాళాదుంపని స్లైసెస్‌లా సన్నగా కట్‌ చేసి అలసిన కళ్లపై కాసేపు ఉంచుకుంటే సరిపోతుంది. అచ్చం కీరదోసలాగే కళ్లకు సాంత్వన అందిస్తుందీ దుంప. అంతేకాకుండా ఈ చిట్కాను క్రమం తప్పకుండా పాటించడం వల్ల కళ్ల కింద ఏర్పడిన నల్లటి వలయాలను దూరం చేసుకోవచ్చు. అలాగే మోచేతులు, మోకాళ్లు, మెడ భాగంలో కూడా చాలామందికి నలుపుగా ఉంటుంది. అలాంటి వారు ఆయా ప్రదేశాల్లో గుండ్రంగా కట్‌ చేసిన బంగాళాదుంప ముక్కలతో కాసేపు రుద్దుకొని చల్లని నీటితో శుభ్రం చేసుకోవాలి. ఇలా క్రమం తప్పకుండా చేయడం వల్ల ఆ సమస్య నుంచి త్వరగా బయటపడచ్చు.
