ఇలా చేస్తే నీరు అమృతమే!

అమృతం అంటే ఎవరికిష్టం ఉండదు చెప్పండి. అలాగని దాన్ని మనం తాగలేం.. ఎందుకంటే అది దేవతలకు మాత్రమే పరిమితం కాబట్టి. మరి మన భూమిపై అమృతంతో సమాన ప్రాధాన్యం ఉన్న నీరు తాగమంటే మాత్రం.. మనలో చాలామంది నిర్లక్ష్యం చేస్తుంటారు. చలికాలంలో అయితే మరీనూ.. అయితే రోజూ నిర్ణీత మొత్తంలో నీటిని తీసుకోవడం వల్ల హానికారక విషపదార్థాలన్నీ బయటకు వెళ్లిపోయి, వివిధ అనారోగ్య సమస్యల నుంచి దూరంగా ఉండడం మాత్రమే కాదు.. శరీర బరువునూ అదుపులో ఉంచుకోవచ్చు. ఇంతటి దివ్యౌషధాన్ని ప్లెయిన్‌గా తీసుకోవడానికి అయిష్టత చూపించేవారు అందులో కొన్ని సహజసిద్ధమైన పదార్థాల్ని కలుపుకొని కూడా తీసుకోవచ్చు. ఫలితంగా నీటిని రుచికరంగా తయారు చేసుకోవడంతో పాటు మరిన్ని ప్రయోజనాల్ని కూడా పొందచ్చు.

కీరాదోస, పుదీనాతో..

ముందుగా మూడు కీరాదోస కాయల్ని, నాలుగు నిమ్మకాయల్ని తీసుకుని చక్రాల్లా కట్ చేసుకోవాలి. లీటరు నీటిలో ఈ ముక్కల్ని, కొన్ని తాజా పుదీనా ఆకుల్ని వేసి.. రెండు గంటల పాటు ఫ్రిజ్‌లో పెట్టాలి. అనంతరం నీటిని వడకట్టుకుని తాగడం వల్ల క్రమంగా బరువు తగ్గడంతో పాటు అనేక ఆరోగ్య ప్రయోజనాల్ని కూడా సొంతం చేసుకోవచ్చు. ఈ నీరు శరీరంలోని మలినాల్ని, విషపదార్థాల్ని బయటికి నెట్టివేస్తుంది. నిమ్మలోని ఆల్కలిన్ సమ్మేళనాలు రోగనిరోధక శక్తిని పెంచుతాయి. అలాగే పుదీనా జీర్ణశక్తిని మెరుగుపరిస్తే.. కీరాదోస చర్మ ఆరోగ్యానికెంతగానో మేలు చేస్తుంది. కాబట్టి చలికాలంలో నీరు తాగాలనిపించినప్పుడు ఈ మిశ్రమాన్ని నీటికి బదులుగా తీసుకోవడం చాలా మంచిది.

పండ్లతో..

నిమ్మ, ద్రాక్ష, యాపిల్, కివీ, అనాస.. వంటి పండ్లతో తయారు చేసిన పానీయం కూడా బరువు తగ్గడంలో ఎంతగానో తోడ్పడుతుంది. ఒక గ్లాస్ నీటిలో కొన్ని పండ్ల ముక్కల్ని వేయాలి. ఈ మిశ్రమాన్ని రిఫ్రిజిరేటర్‌లో కొన్ని గంటల పాటు ఉంచాలి. ఆ తర్వాత మిశ్రమాన్ని వడకట్టుకునైనా తీసుకోవచ్చు.. లేదంటే ముందు పండ్లు తిని ఆ నీరైనా తాగచ్చు. ఈ పండ్లలో ఎక్కువ మొత్తంలో ఉండే యాంటీఆక్సిడెంట్లు, ఎంజైమ్‌లు శరీరంలోని విషతుల్యాలను తొలగించడంలో సహాయపడతాయి. అంతేకాదు.. జీవక్రియల్ని వేగవంతం చేసి శరీరంలోని అనవసర పదార్థాల్ని అతి వేగంగా బయటికి పంపించడంలో ప్రధాన పాత్ర వహిస్తాయి. అలాగే వీటిలోని విటమిన్ 'సి' కణాలకు పోషణ అందిస్తుంది. ఇవేకాదు.. చలికాలంలో దొరికే పండ్లతో మీకు నచ్చినవి కూడా కలుపుకోవచ్చు.

దాల్చినచెక్కతో..

ఒక గ్లాస్ నీటిలో కొన్ని యాపిల్, దాల్చినచెక్క ముక్కల్ని వేసి.. ఈ మిశ్రమాన్ని గంట పాటు ఫ్రిజ్‌లో ఉంచాలి. మరీ రుచిగా కావాలనుకున్న వారు యాపిల్, దాల్చిన చెక్క ముక్కల్ని కాస్త ఎక్కువగా కూడా కలుపుకోవచ్చు. ఈ పానీయంలో క్యాలరీలు అసలే ఉండవు. కాబట్టి కూల్‌డ్రింక్ బదులు దీన్ని తీసుకోవచ్చు. దీనివల్ల త్వరగా బరువు తగ్గడంతో పాటు శరీరంలోని హానికారక విషపదార్థాలు కూడా వేగంగా తొలగిపోతాయి. అలాగే శరీరంలోని జీవక్రియల్ని కూడా వేగవంతం చేయడంలో ఈ పానీయం కీలకపాత్ర పోషిస్తుంది.

కలబందతో..

చర్మంలోని విషపదార్థాల్నే కాదు.. శరీరంలోని విషతుల్యాలను తొలగించడంలోనూ కలబందకు సాటి మరేదీ లేదంటే అతిశయోక్తి కాదు. కప్పు శుభ్రమైన నీటిలో, రెండు చెంచాల చొప్పున నిమ్మరసం, కలబంద గుజ్జు తీసుకుని మిశ్రమంలా తయారుచేసుకోవాలి. మరింత బాగా కలవాలంటే మిక్సీ కూడా పట్టుకోవచ్చు. ఈ మిశ్రమాన్ని తీసుకోవడం వల్ల శరీరంలోని అలసట వెంటనే దూరమవడంతో పాటు జీర్ణశక్తి కూడా మెరుగుపడుతుంది. ఫలితంగా బరువూ తగ్గచ్చు.

చెరకుతో..

రెండు లీటర్ల పరిశుభ్రమైన నీటిలో.. ముక్కలుగా తరిగిన అనాస, చెరకు ముక్కల్ని వేసి రెండు గంటల పాటు రిఫ్రిజిరేటర్‌లో ఉంచాలి. ఆ తర్వాత వడకట్టుకుని తాగితే మంచి ఫలితం ఉంటుంది. చెరకు వేయడం వల్ల ఈ పానీయం రుచిగా ఉండడంతో పాటు అది మన శరీరంలోని విష పదార్థాల్ని వెంటనే బయటికి పంపించేస్తుంది. ముఖ్యంగా అనాస ముక్కలు శరీరంలోని ఫ్రీరాడికల్స్‌ని తొలగించడంలో ప్రధాన పాత్ర పోషిస్తాయి. చెరకు అలసటను దూరం చేసి తక్షణ శక్తిని అందిస్తుంది. అలాగే చెరకులోని విటమిన్లు, ఖనిజాలు.. రొమ్ము క్యాన్సర్, ఇతర ఆరోగ్య సమస్యల్ని దూరం చేయడంలో కీలక పాత్ర పోషిస్తాయి.

కొవ్వు కరగడానికి..

శరీరంలో నీటి నిల్వను పెంచి తద్వారా అనవసర కొవ్వుల్ని కరిగించడంలో యాపిల్ సైడర్ వెనిగర్‌తో తయారుచేసిన పానీయం కూడా బాగా ఉపయోగపడుతుంది. ఇందుకోసం గ్లాసు నీటిలో కొద్దిగా యాపిల్ సైడర్ వెనిగర్ వేసి బాగా కలిపి తీసుకోవాలి. చల్లగా కావాలనుకునే వారు అందులో కొన్ని ఐస్ క్యూబ్స్ వేసుకోవచ్చు. ఈ మిశ్రమం అజీర్తి సమస్యను దూరం చేసి తద్వారా బరువును అదుపులో ఉంచుతుంది.
శరీరంలోని మలినాలను తొలగించడంతో పాటు అధిక బరువును తగ్గించుకోవడానికి తోడ్పడే రుచికరమైన పానీయాలు ఎలా తయారుచేసుకోవాలి.. వాటివల్ల కలిగే ఉపయోగాలేంటో తెలుసుకున్నారు కదా! మరింకెందుకాలస్యం? వాటిని తీసుకోవడం వెంటనే ప్రారంభించేయండి. రుచిగా ఉండే నీటితో ఇట్టే బరువు తగ్గండి.

ఇదీ చూడండి: కీళ్ల నొప్పులతో బాధపడుతున్నారా... అయితే ఈ స్టోరీ మీకోసమే...!