సిద్దిపేట జిల్లా జగదేవ్పూర్ మండలం పీర్లపల్లి సమీపంలో రోడ్డుప్రమాదం చోటుచేసుకుంది. ద్విచక్ర వాహనం కల్వర్టును ఢీకొని, నీటి గుంతలో పడిపోయింది. ఘటనలో ఇద్దరు యువకులు అక్కడికక్కడే మృతి చెందారు.
మేడ్చల్-మల్కాజిగిరి జిల్లా మౌలాలీకి చెందిన అనిల్ గౌడ్, ఉపేందర్లతో పాటు మరో 15 మంది యువకులు 2 ఆటోలు, ఒక ద్విచక్ర వాహనంపై సిద్దిపేట జిల్లా జగదేవ్పూర్ మండల కేంద్రంలో ఆదివారం జరిగిన ఓ బరాత్కు బ్యాండ్ వాయించేందుకు వచ్చారు. కార్యక్రమం ముగియగానే అదే రోజు అర్ధరాత్రి ఒక ఆటోలో కొంతమంది తిరిగి వెళ్లిపోయారు. మరో ఆటోలో మరికొంతమంది సోమవారం తెల్లవారుజామున బయలుదేరారు. ఈ క్రమంలోనే అనిల్ గౌడ్, ఉపేందర్లు ద్విచక్రవాహనంపై వస్తూ.. మార్గమధ్యలో పీర్లపల్లి సమీపంలోని ఓ కల్వర్టును ఢీకొని, నీటి గుంతలో పడిపోయారు. ఘటనలో యువకులిద్దరూ అక్కడికక్కడే ప్రాణాలు విడిచారు. వెనకాలే వచ్చిన ఆటోలో ఉన్న యువకులు.. విషయాన్ని గుర్తించకుండా ఇళ్లకు వెళ్లిపోయారు. ఎంతసేపటికీ అనిల్, ఉపేందర్లు ఇంటికి రాకపోవడం వల్ల కుటుంబ సభ్యులు ఉదయం నుంచీ వారిని వెతకడం ప్రారంభించారు.
పీర్లపల్లి గ్రామానికి చెందిన ఓ వ్యక్తి కల్వర్టు కింద నీటిలో ద్విచక్ర వాహనం కనిపించడంతో పోలీసులకు సమాచారం అందించాడు. ఘటనా స్థలికి చేరుకున్న పోలీసులు ద్విచక్ర వాహనంతో రెండు మృతదేహాలను వెలికితీశారు. మృతులు అనిల్, ఉపేందర్లుగా గుర్తించి.. వారి కుటుంబ సభ్యులకు సమాచారం అందించారు. పోస్టుమార్టం నిమిత్తం శవాలను గజ్వేల్ ప్రభుత్వ ఆసుపత్రికి తరలించారు. ఈ మేరకు కేసు నమోదు చేసుకొని దర్యాప్తు చేస్తున్నారు.
ఇదీ చూడండి: అదుపు తప్పి నీళ్ల ట్యాంకర్ బోల్తా.. డ్రైవర్ మృతి
