సంగారెడ్డి జిల్లా కోహిర్ మండలం కవేలి చౌరస్తా సమీపంలో రోడ్డు ప్రమాదం సంభవించింది. రెండు కార్లు ఎదురెదురుగా వచ్చి ఢీకొన్న ఈ ప్రమాదంలో ఆరుగురు తీవ్రంగా గాయపడ్డారు. 65 నంబర్ జాతీయ రహదారిపై జహీరాబాద్ నుంచి హైదరాబాద్ వైపు అతివేగంతో వెళ్తున్న కారు డివైడర్ దాటుకొని ఎదురుగా వస్తున్న మరో కారును వేగంగా ఢీ కొట్టింది.
ఈ ఘటనలో రెండు కార్లలోని ప్రయాణికుల్లో ఆరుగురు గాయపడ్డారు. క్షతగాత్రులను హుటాహుటిన జహీరాబాద్లోని వైద్య విధాన పరిషత్ ప్రాంతీయ ఆస్పత్రికి తరలించారు. ప్రమాదం వల్ల రోడ్డుపై పెద్దఎత్తున వాహనాలు నిలిచిపోయాయి. సమాచారం అందుకున్న పోలీసులు ఘటనా స్థలానికి చేరుకొని జాతీయ రహదారిపై రాకపోకలను పునరుద్ధరించారు.
